Somos caballeros d´otres dómines perdíes. Pero un día volverán les pisaes templaries, a caballu, col aceru secañosu. Y alzaránse castiellos enllenos d´arguyu torgando tantu estrozu. Que yá va siendo hora. Que yá suenen les cuernes llamando a conceyu. Les espades tán n´altu. Les piques, clavando la tierra. Un ensame de xente n´armes, un puxu nuevu. La Tierra glaya: Tamos de vuelta.

Comments

Chapuzando´l zusme que los vivos avecen nomar sangre, endolcáu en coraes y guxanes de lo más perfondo, vieno'l xabaz príncipe ténebre, rei de pínfanos imposibles de pescudar. Y entós  va y diz: “Sois míos”.

Comments

Llena les ánfores cóncaves con sesos y coraes. El demiurgu sangrín va revolver la mecedura. La maldá más perfonda del Universu va surdir de la so boca. Cuspiendo la bébora fedionda, toa castra de creatura malina va llevantar cabeza baxo´l Sol. ¿Sol? ¡Astru ofendíu! Yá nun gocies de reinu dalu baxo la to corona dorada…

Comments

Esploradores somos

Qu´anecien pescudar páxaros

Nel mar perfondu

Y nun somos quien a estremar

Escames o plumes,

Rises o lloros,

Barcos fundíos,

Estrelles brillantes,

Sían de cielu o de mar.

Asina somos,

Asina aportamos:

Y en riscando l´alba

Alcordaránse de nós,

Los que pasemos de nueche

Ensin ruíu, selemente,

Con andar de palomba,

Falando baxo

 Y con vocación de lluceros.

Comments

 

Llegáu´l tiempu

Voi andar lo desandao

Y esguilando pa la cume

Más alta, onde añeren les Reines

De vista llonxana

Espurriré míes ales nueves

Arcanxéliques ya infinites

Pa dir atropando oxetos perdíos

 Na oficina que l´Olimpu fundó.  

Comments

 

Vien de nueche

Con pasu sele

Qu´arreciende a muerte.

Vien d´una estrella

Brillante y fea

Onde moren los muertos

Onde glayen de pena.

Y trema la Muerte

Al ver la llaceria

De la vida podre

 Más terrible qu´ella.

Comments

 

Y como dicen vieyos sabios:

Sabiu ye´l que mira llonxe

Y guarda too na memoria

Pa colar a tiempos remotos

U buscar nuevu cazumbre pa los venideros.

Y porque equí yá nun queden vivos

Y los amigos colaron col vientu fresco

Hai que llantar bandera

De gayeru imperiu nuevu

Onde añeren les aigles fuertes

De vista infinita y etereu cristal

Nel cristalín irrompible d´Argos celestial.

Nes cumales que busquen gloria quiero

Facer palacios y votos a la sencia alicada

Y dir más alto si soi quien.

Que naide me torgue esti divín vuelu

Al Ida tremendu, d´au vinimos una vez los felices

Comments

Hai un arume de llerza y misteriu

Neses imáxenes que ronden

Al rodiu de la mente n´inxesta

Que nagua por otru horizonte

Y nunca nun por esta vida febleF

echa de remiendos y clavos.

Hai un tastu secu y fonderu,

Un agrín de dolce ya ingrienta testura

Que vive inda cuando nun hai vida verdadera

Y esnala pente cotolles puerques

D´au medró un guapu xardín y un texu

Quietu y altu, como l´arguyu fácil d´achaplar.

Sacru asientu la tierra

Onde tu xugasti,

Tierra que va abrise pa xintar calabres,

Tierra negro de vientre feliz.

Comments

 

“L´arispia llingua del Príncipe aportó dende la Nueche, la Ma de la Tierra y del Firmamentu. Elli llevantóse contra´l Reinu cuantayá, cuando entá nun esistía´l Mundu, y mandó a les Muses de los Cementerios reinar polos sieglos de los sieglos. Y el Pá consintió y nada nun fizo…”

Comments

Nun sé cuándo les coses emprimar a cayer. Sólo sé que too s´esbarrumbó y nada nin naide queda pa historialo. Ye una pena que yo y tu cayéramos, y que cayera tol mundu nuna lloca rindición, de les que yá nun se dan, como les del vencíu qu´agacha´l cuerpu pa besar les botes del que t´invade. Yo creo que foi un folaxe d´esos tremendos, una vagamar o galerna, de les que nun ye a aguantar El Muro y tira la casa abaxo. El mundu yá nun ye lo qu´antaño yera: veo les llombrigues nalando na mar, y veo los güesos saliendo nel contenedor del Barriu L´Arena. Un neñu llora baxo l´alcantariella, y les gaviluetes saquen los güeyos a la xente. Nun sé, pero dame que les coses emprimaron a cayer.

Comments

Avérense los seres ensin forma, a palpu percuerren mio cuerpu y entren nes coraes de mio ser con esi rispir por vida que nun soi a entender. Dixéranme que too taba muerto y xacía´l mundu por fin ensin calidá nin sustancia. Y agora resulta que tán ellos equí, perfurando les tumbes y asitiando la so bandera d´espantu onde sobren los calabres. Noxu por siguir consciente, magar que non vivu, porque yá me paez tenrura esi entrar dientro de min…

Comments

Tres la llábana biltó la mano. Una mano d´home, güesuda y col cande color de cañamina puerco, entemecío con podrén. Tres la mano, un güeyu. Y col güeyu un espantible mirar dende l´otru llau, el llau d´au nunca se torna, resalviando que tornen como non vivos, los que siempre nagüen por sangre y carne. Son la materia más baxa, la que´l Demiurgu cuspió ente arcaes. De tala voltura surdió un Mundu. Desi Mundu formo parte yo. Y el güeyu, tres la llábana del cementeriu, ta mirándome.

Comments

¿Ye esto un País o más bien una podrén

Onde clamien los mudos

Y palpuñen los mancos

Pa caer más baxo del suelu,

Y sapozase na más escura humildación,

Nuna derrota

Ganada a pulsu…?

¡Qué va ser País!

Mira lo que ye:

Cuadra d´oveyes,

Armentíu d´almes cégares y grandones

Pila cucho onde nun hai…

Más baxo inda nos queda caer.

Comments

Aportaron los soldaos.

Teníase prohibío l´usu de les puertes. L´aire fríu del hibiernu yera´l mayor intrusu. Yá nada importaba l´espoliu nuestru de cada día, robándonos fíos, forciando muyeres, dexándonos ensin nada. L´aire fríu del hibiernu constituyía´l mayor de los castigos, la horrible solombra de la inxusticia.

Aportaron los soldaos.

Y punxeron grasa a les cadenes –siempres tuviéramos cadenes- y éstes, dacuando, garraben óxidu y abríen capes, sutures y firíes fondes nos nuesos cuerpos.

Xintábamos el pan que mos dieron. Sonó´l toque de queda y los focos allumaron les cais onde medraba l´espino metálicu.

El ruíu de les botes y de les orugues de máquines pesaes, los tanques y demás soníos de la esclavitú yera tola música que sonaba nesti mundu.

Aportaron los soldaos.

Obedientes, enfoscaos, mecánicos. Sos güeyos taben baleros –ensin vida. Acostumáronse a actuar y nunca mos observaben. Nun facíen gracies los neños destetaos, a los vieyos esnudos, a les costielles con relieve sobresaliendo pela pelleya.

Nuestru númberu marcábase al fueu y una cámara observaba cada movimientu, inda cada baille de pestaña, cada respiración, cada carpir.

Aportaron los soldaos.

Y llamentábemosnos por aquel día nel que cedimos. Yá yera tarde pa rebelase. Nunca nun debimos baxar la guardia.

Perdiéramos nuesa oportunidá de barrelos de la superficie de la tierra.

Comments

Un día vinieron a sapozame na tierra prieto que quedó tres l´ataque. Ellí pasé bien de díes, cola cabeza acusbiando namás y un sable ferviendo comíame´l restu´l cuerpu. Terribles inseutos esnalaben alredor de mio, y furábenme los güeyos ensin piedá, esfrutando como lloques boles peludes del tamañu d´un puñu. Al glayar, yo abría muncho la boca y les criatures invertebraes entraben llambiones y atrevíes, y les rucaba solamente por sobrevivir, encloyando con indicible noxu la so sustancia prieta y pastosa. Ficieran lo mesmo con tolos demás humanos, y milenta criatures que mutaron coles esplosiones algamaron con nós un humanu alimentu. La nueva dómina llegó. Sía.

Comments

 

Xorrecen ánimes como perles con rellumu, ellí onde la nueche ye mantu de llimpia tristura…Xorrecen y nun siento namái que´l cantu sele de sapos y sacaveres. Anochando como quien diz qu´anuecha l´alma nun veloriu polos vivos cuando los sapocen dientro´l vientre, esi vientre de tierra, el d´un suelu la cuenta pa felechos, onde llombrigues bien gordes encloyen cuerpos a más nun poder…

Comments

Comments

 

Con un puñáu de recuerdos

Puestos al recostín

Ente xigos puestos de cantu

Y ensin botes pal camín…

Llanzóse a la gueta d´un mundu

Naguando por vivir,

Y en metá la trupa sienda

Quixo él dexar de sofrir…

Pero querer ye una cosa

Y otra, algamar el destín.

Comments

 

La güesuda mano acusbando pente los felechos y la llosa. Mármole y cadarma de marfil, ye too ello un restu d´una vida gastada. Ye la fin, too llaceria. Y salen los guxanes necrófagos. Amos son de la vida y de la muerte, lémures que remanen la vida sapozada baxo tierra y na tumba. La mano llevanta la llosa y da anuncia d´una nueva dómina d´escuridá. Nueche eterna pa esfrutar col marfil al aire.

Comments