SERONDA ESCURA: Poemes y rellatos siniestros y románticos
Vamos entrar nuna nuea dómina de romanticismu nel País Ástur: has d´acompañame.

 

La camaretá 

El profesor M. algamó della sonadía nel mundu de l´arqueoloxía polos sos bultables afayos na investigación de cultures perdíes en llonxanos continentes. L´abluque o inda la indignación apoderábense de los sos collacios de profesión cuando M. esanició de sutrucu y ensin güelga dala un día cualquiera de 19… Falo d´indignación porque tres de ser lloráu y veneráu con estatues y honores por aciu d´un casu d´”heroicidá científica” dalquién prebó, al traviés de dellos documentos, que´l renomáu profesor algamara una financiación de cuantía considerable pa trabayar na llonxana Asia ensin que se pudiere demostrar en dengún momentu que´l profesor abandonara´l so gabinete. La familia faló de ciertu trasiegu, un dir y venir, per países perdíos y desconocíos pero la comisión zarró l´asuntu cola sospecha embaxo´l brazu. La “heroicidá” camudóse en “presunta deshonestidá” colos fondos de la Universidá. Pero o bien M. taba muertu yá cuantayá o una llocura repintina afalólu a engañar a la ciencia pa guardase Dios sabía ónde con unes perres coles que nun diba sobrevivir más de dos años. 

Yo fuera´l so collaciu d´estudios dende la temprana edá de los diez años. Coincidimos en delles universidaes americanes y europees, ya inda afechiscamos xuntos una campaña d´escavaciones nel Mediterrániu. Recuerdo que M. taba desinteresáu en forma, dende bien ceo, no tocante al estudiu de les cultures clásiques. Afirmaba de contino que pa elli y pa toos nós esti yera un aburríu puntu de partida, l´estremu d´una cuerda del que debíamos tirar, pero namás qu´eso. M. entregóse en cuerpu y alma al estudiu de la más arcaica antigüedá. Naide como él interpretó con mayor exactitú les reliquies perdíes nes estepes y montes de llonxanos y xabaces países…Tuvo ceo munchu ésitu nos medios académicos. Los collacios de la so especialidá lu veneraben. Les monografíes de so yeren monumentos al trabayu fechu con procuru y disciplina. Y les más atrevíes hipótesis yeren afitaes con evidentes prebes.  Xusto l´añu del so casoriu con Ana P., llanzó les campanes al vuelu tocántenes a la so teoría sobre les divinidaes del bosque de Zerbhon, nes perfondidaes del Kamastán. Demientres un añu, hebo convivir con estraños asiáticos de mirada felina y roceana. Con fondos escosaos y dengún abellugu énte´l clima y les xentes –siempre fosques- M. desenterró estatuines y altares que “rellumaben aínda na trupa escuridá del Kamastán”. Truxo dellos afayos a la Universidá. El so ésitu fo meteóricu. En pocu tiempu preparó monografíes ablucantes al rodiu de dioses antiguos y cultos demoníacos. Escaezámonos per un momentu del profesor M., yá muertu, en Kamastán o dalgún otru selvaxe país.

Ye hora de falar agora del xoven Saúl, l´estrañu fíu de M., frutu del so casoriu.  A resultes de la mio amistá col profesor hubi facer investigaciones equí y ellí sobre la so estraña desapaición. La señora M. rogóme, con llarimes nos güeyos, que lu ayudase a pescudar daqué. Misteriosamente, les oficines de la Universidá nun revelaben información dala sobre´l puntu de destín del profesor nin de los fondos que se-y teníen entregao. Tala irregularidá alministrativa nun tenía dengún xacíu. Enantes de la concesión d´un sofitu económicu yera vezu pidir detalles que daben seguranza a los financiadores. Nesti casu naide sabía nada. M. nun tuvo entrevistes. Algamó´l dineru entainando, pero de forma llegal. La salida de la cantidá y la robla del profesor figuraben nel Bancu del Cantábricu, pero ellí nun constaba mayor información sobre la operación. La policía, y yo mesmo, fizo averiguaciones nes axencies de viaxes, puertos, estaciones de tren y autocar… Naide sabía un res. De mano, naide podía ñegar que M. saliera del país. Los sos collacios n´Europa, ingleses y alemanes, nun sabíen nada del asuntu y manifestaron toos la sorpresa de so énte la desapaición. Pero velequí qu´una nueche d´hibiernu una llamada telefónica de la Sra. M. reveló una fonte de datos inaudita. La esposa de M., con angustia descomanada, pidíame por favor que fuera a vela. La Sra. M. aguardábame n´antoxana de la so casa, col rostru esgonciáu, talo como si tuviera acabante de ver un monstruu. Pero´l monstruu yera´l so propiu fíu, Saúl. Namás veme, la señora garróme del brazu y empobinóme al cuartu del fíu pequeñu. Ellí taba Saúl M. faciendo estraños esconxuros y vocinglando como un llocu coles estatuines de so pá. Yo averéme a elli ya igual de cimblón que la so ma malapenes algamé a dicí-y: “¡Saúl…!” 

El neñu volvióse. Y los sos güeyos rellumaben como calicores bermeyos. Tamién les estatuines amosaben un rellume estrañu que somorguiaba´l cuartu en solombres negres dibuxaes sobre un fondu encarnáu. Tan espantible escena féxome recular p´atrás. La ma, nun estáu de bultable escitación, díxome dalgo rellacionao cola posesión del críu. Pesllando la puerta, yo intenté comencela sobre la naturaleza psiquiátrica del problema del neñu. Les míes esplicaciones nun yeren mui creíbles. Ni tan siquiera yo mesmu podía cuidar qu´una dolencia psíquica “allumase” a Saúl d´aquella mena espantible. Endagora recuerdo aquellos malinos güeyos…

¡La maldá nun neñu de nueve años!  

En adicando otra vuelta no que facía la Sra. M.. vi que tenía una oreya apegada a la puerta. Yo fici lo mesmo qu´ella y talmente paecía qu´al otru llau sintía una voz más xunto a la de Saúl. Una estraña voz que flotaba pente les paredes del cuartu. La ma, revolucionada, esbarrumbóse sobre´l suelu ensin que yo fuere quien a alitala. Cuando me concentré n´aquella voz… ¡Decateme de que yera la del desapaecíu profesor M. ¡ Abrí de sutrucu la puerta d´au venía la voz, y nun vi otro qu´al pequeñu Saúl. Esti volvióse contra min con mirada aínda más enfoscada que la primer vegada. El tamañu del críu paecía medrar, cuasimente´l doble, pero´l rostru de neñu taba dibuxáu nél entovía. Pero esos güeyos… Nos güeyos percibíase´l fueu del infiernu.  Tol cuerpu de Saúl tremaba con espantibles convulsiones. Ya la so cabeza encesa paecía a piques d´españar. Glayé d´espantu, y xusto cuando´l rapaz me señaló col deu, una sombra, pémeque xorrecía d´una de les estatuines, cubrió al neñu posesu… Y la solombra nun yera sinón la del propiu profesor desapaecíu. Dalgo nél había de tresparente ya irreal, pero la voz dicíame con seguranza total qu´esa yera la so identidá. El qu´enantes fuera reconocíu profesor d´Arqueoloxía agora malapenes yera una bisarma, una triba d´esencia malina lliberada del interior d´una esgonciada estatuina. Eso yera lo que quedaba d´elli. -       

  ¡Marcha! – díxome con voz llonxana, poblada de milenta bóvedes ya interferencies.- ¡Marcha! ¡Solo salí pa davos alvertencia! Atropé fuerces pa nun salir d´elli a carrenderes.

 La curiosidá, pamidea, foi más poderosa que l´axorizu. 

-         ¿D´aú salisti? 

La voz o la sombra de M. respondió: 

-         De la mio estatua. Ella suxétame. Yo soi´l so prisioneru. Solamente un pocu de mio espíritu salió a falar contigo y col mio fíu Saúl. El restu ta prisioneru dientro la estatua.  

Un pensamientu horrorosu ximelgóme otra vuelta. Sintiera falar de delles lleendes orientales que falaben d´encantamientos que los dioses de les estatues facíen colos sos adoradores. Esos dioses arcaicos a los que cristianos y demás monoteístes nomamos demonios, viven nel interior de les estatuines como reis d´un infiernu de piedra, y ente les resquiebres de les mesmes hai llugar pa toa una camaretá d´adoradores y sirvientes. 

-         ¡Alviértote!- Dixo la estatua, asemeyada a una sombra - ¡Equí nun hai sitiu pa más!-          Solo taba seguru d´una cosa: M. debió cometer dalguna horrible profanación al trayer esa triba d´estatuines al mundu civilizáu. La so difusión pel mundu civilizáu en museos d´Europa y américa yera un fechu. Espardíase la solombra d´un horrible peligru. Y recordé entós la inscripción que n´estraños carácteres solía alvertir caúna de les divinidaes, repitiendo les palabres del espíritu de M. :

“Equí hai sitiu pa una camaretá!. Mentanto, la sombra apenzó a dilíse y dixo: -         Voi llevame a Saúl. Y el pequeñu Saúl quedó clisáu metanes rares chispes y vapores. Nin un res quedó d´elli. Enantes que la señora M. alicase, garré les estatues y arreflundíles al fondu d´una llamuerga cerca de la casa. Ella esconsoñó nun centru médicu ensin recordar nada, completamente n´ayén dende´l puntu de vista mental.

 Agora, en tolos famosos museos hai mieu a un estrañu llocu que con una maza y un sacu va a robar y esgonciar antigües estatuines asiátiques.