Soi un estrañu
Miré al espeyu y yá nun yera yo. Miré y miré, y namás posaba énte min un ente estrañu de güeyos encesos, garres perllargues y malapenes humanu. Un ente siempre naguando por pasar al mio llau. Hubi dar la espalda a esa visión. Quixi vivir como si yo fore aínda´l de siempre. Pero nun yera verdá. La xente daba xirpíos namás veme. La xente espantuyada corría dando galmiaes ya apellidando al so Dios. Pero cuido que Dios nada nun sabía d´estos asuntos. Nun s´esmolgaba polos condenaos qu´usáramos –un malditu día- d´artes máxiques que mos devolvíen a l´antigua condición: la de seres primixenios que grayen y rastren pel llodu, que grayen y muerden, estraños aportaos de llonxana estrella, invasores que ñacen yá cola condena. Naide ye´l que yera…
Esbilla
del.icio.us