SERONDA ESCURA: Poemes y rellatos siniestros y románticos
Vamos entrar nuna nuea dómina de romanticismu nel País Ástur: has d´acompañame.

Decatase
del
Tiempu

1.
Decatase del tiempu
Nun ye más que sintir dolor.
La comedia, si da gayola,
Pasa pente min ensin marmuriu tan si quier.
Pero en cuantes hai noxu y sangra l´alma,
Esi condergáu ríu de los instantes
Vien a recordame cuantu nun fixe,
Ya peor entá, lo que fixe.
Decatase del tiempu
Ye como oyir que too se va,
Comu´l calabre cuando sabe
Qu´al otru díi yá nun llarimen por elli,
Y que lu van a escaecer.
Escaecémonos toos de toos,
Naide debía tener coraes
Si esistir esiste´l tiempu,
L´escaezu y la llonxana separtación.
Que si hai tiempu
O nun lo hai,
Teo pa min que morrer ye vivir,
Amar y ser queríu,
Pero nun lo saber.
¿Que si hai tiempu?, dicís.
La pena de lo que pudo ser, y nun pudo ser,
Ye pa min l´entrugu eternu, el braeru xuez.
Que la vida tien sendes
Peles que caniar ye comu andar descalzu,
Ente espines y artos,
Esnudu nazarenu, de tou dios abandonáu,
Ensin xaciu pa esnalar pelos aires,
Ensin xera nin pa dar pena,
Odiáu nun sé si de toos, pero de ti mesmu
Odíáu de xuru, mui odiáu.
¿Qué fixiste y por cuenta de qué?
¿Au vas tan llanzáu, zapicando pente coroques que son valeros?
¿Tabes dormíu, tabes suañando?
Enquivoques les sendes, y nun hai caleya que sía la to senda.
Que si orbaya, que si truena,
Quies tragate milenta calendarios
Y tornar a la to sencia,
Que ye sienda perdía, que ye monumentu a la to pena.
Si supieres amar, daveres pal qu´ama
Hai llar, hai casa, hai tenrura que-y espera.
Nel afandu cotidianu, suañes col sol rellumando
D´un día perdíu, d´unasiendaescaecida
Ente lesfueyesseques del tiempu.

*****
Perdón, yo yá nun teo perdón.
Quedeme en mar llantáu, ensin vientu,
Mui lloñe del otru naufraxu que produciera en ti.
Solos, col agua distanciándonos, varaos
nun mundu tan valeru,
el mesmu que hubiéremos podido vaciar
ente rises y gayoles.
¿Perdón?, yo yá nun sé si merezo vivir,
Despreciando l´ayalga qu´una sola vez de milenta t´apruz.
O nun sabiendo ver, que ye peor que tar cégaru,
O tando llocu y confusu,
Arispiu al bon xaciu
Y al to braeru ser.
Que nesti naufraxu voi alloquecer,
Que perdí la vida eterna,
que perdí too lo qu´hai en cielu,
Y pesie a ser indultáu
Quixera morreme yá,
y de llárimes, del too, somorguiar.

2.

-¿Quién ye, home sabiu, esi vagarientu
que zapica, taramiella, fala solu y esparavana?
Dime quién pue ser, que de tristura, elli solu se mata,
Y dase de guelpes contra les parés, y nel abisu quier tirase.
¿Por qué diañu gasta eses ropes esfarrapaes,
por qué esi espelurciu, esa roindá,
por qué nun emportayá más nada,
o ye que a la nada, nada tien que-y esmoler?
-Mozu- dixo l´home sabiu,
tú de la vida nun sabes nada.
¿Qué ye lo que-y sobra al home?
“Arguyu, confusión, egoismu y ceguera”.
Y ¿qué-y puede faltar, cuando se tien too,
menos lo que nun se pue mendigar?
- Home sabiu, eso nun lo deprendí entá.
-Voi dicítelo, escolín de les montañes.
Yá pues esguilar a cumales mayores qu´esta,
Onde l´aire, de tan puru que ye, rispírase mal.
Yá pues baxar al llanu, au la tierra ye seco,
Au malpenes medra´l pan, y sí l´armáu cardu,
Yá pues percorrer milenta vides,
En milenta cuerpos, países y dómines,
Que si la to alma ximielga vístela,
Conocer, conocístela,
Y d´esmenu esnidióse pente les manos
Como l´agua pura cola querieguenlos ánxeles,
Esa ye entós la fonte de la llocura,
L´amorir ye causa d´esi probe vagarientu,
Que si non se tira´l abisu aína,
Tendré de facelo yo,
Pa camudalu a la fin en discípulu o n´home muertu.

3.

Un día partó´l barcu
D´esti puertu de brumes,
D´esti sitiu llarimosu,
D´esta homedancia humana
D´esta patria del desconsuelu.
Pero´l barcu nun cruciaba la mar,
Metióse pa dientro
La tierra, dica lo seco,
Au nun medra la herba
Y les llárimes poder secar,
Pela cueta facer del to cuerpu
Esponxa sudorienta ya ensin aliendu.
El barcu nun xixilaba les costes de tierra adientro.
Remanaba n´elli un marín cégaru y alloriáu,
Ensin gavilueta que, esnalando llibre, lu canciare
Ensin serena que lu animara col so dolce vigulín,
Cásique de nuechi siempre, solu, y tiesu,
Cuando´l fríu de payares aportó nos sos güesos.
Nel camarote del barcu, les parés lu comieron.
Nel vientu y peles ondes, la serena sintíase tovía,
Pero llonxe, mui llonxe, too s´esborriaba
Y el marín naufragaba de sigo mesmu
Cola nave al bentestate,
Víctima de los cuatro vientos.
Había mester de tables pa garrase,
Falta tenía de manes membrudes
Pa salvar los estrozos
Del enfoscu de les ñubes y rellampos.
Había mester de aída, de calor, de tiempu,
Pero ye que nun sé yo como
Too camudaba entainando, apriesa, a lo lloco,
Y l´agua somorguíabalu, bautizábalu per dientro, muy dientro.
¿Qué foi de la serena de nalar sele, de rubios cabellos,
Aquella del vigulín marín, de soníos del cielu?
¿En qué fola se fundió, al güelpe de qué vientu?
Baxo´l mar el marín alzó casa,
Rispirando pómpares valeres
Cadeciendo l´aire, llantando banderes nel sable,
Au nin los pexes añeren
Tan al fondu, tan al fondu...
Llonxe d´esi llonxanu puertu.
Esi de la ñublina misteriosa,
Esi de les galernes xabaces, y el tin-tín de los aparexos
De balandros xixoneses, que tremen al vientu.
Tas allonxáu, puertu, serena, nordés, vientu que m´añó.
Tas mayáu, somorguiáu marin, cégaru capitán,
De los que naveguen fatos tierra adientro.
Alcuérdeste tantu del canciu de gaviluetes,
Del vigulín tienru,
De güeyos misteriosos que tien la vida,
De la llocura d´Ulises al velos, mios güeyos, falar,
Col brillu d´unes notes marineres,
Col llinguax eternu.

4.

Soi un home de caleyes y senderos,
Ente espinos me crié yo,
Saber sé ónde ta´l mio llar,
Pero nun alcuentro manera,
Ente biesques y llamuergues,
D´aportar a la mio casina blanca xunta´l pedreru.
Ellí viví sonce los branos
De tres o cuatro meses llargos.
Con un umeru grandón al fondu,
Con dos pumares vieyos,
Con un pozu de poco agua.
Ellí fíxeme a les coses talantar.
De neñu fíxeme al verde
D´un prau pindu, enllenu felechos,
Lleí lo que nun ta escrito, fasta los llibros malos
Güeyaba bien cerque la mar.
Enantes sonaben muncho los barcos,
Y les voces de los marinos sintíense al delláu mesmu.
Visitábenme toos los gatos del pueblu,
Y del sol fuxía con toballes engueltes na tiesta.
De grande, dí gracies a la paz aquella,
Depués de pasar de neñu, aborrencia.
Sin el mio pa, que lo sacare alantre
Llevanté bandera, llanté árboles.
Pero yá d´eso nun queda nada,
Dalgún qu´otru recuerdu,
Pero l´escaezu siempre impera
Nesti mundu indinu, nesti hibiernu
Llargu y sele que ye la vida
Cuando la metá de la vida,
yá debe tar percorrida.
Unos añucos anantes
De feriar la casa en probe venta,
Deprendí a abrir caminos,
Explorarsiendesde la redolada
Y entoncies supe que la vida s´enancha,
Que tas en metá d´una gran llábana
Verde, que percorrela diba llevate la vida entera.
L´hibiernu yera escaezu
De la verde y azul esistencia,
Xixón yera gris y triste,
Mui tristayu daquella.
Recuerdo namái fuelgues,
Recuerdo orpín de barru
Y cases prietes o grises,
Con güardilles de piedra fea.
Recuerdo calles moyaes,
Au nun paraba ni l´alma siquiera,
A garrar aliendu tres la carrera
Que´l bastiazu afalaba al pasiante solitariu.
Medré y fíxeme home,
Ente´l campu y la ciudá marinera,
De les foles siempre ruidoses
Del orbayu y del llocu nordés.
Foron los llibros la tabla del naúfragu,
El refuxu énte la xentualla.
Al nun tar a gustu en casa,
D´una casa de llibros fixe residencia.
Pero quixo´l malváu destín
Que con ellos nun fixere muncha carrera,
Siempre a min m´asocedía
Que l´esfuerciu mio tirabase pela borda
Quedando yo al bentestate, ensin arguyu,
Nin llibertá, lo que yo más guetaba
Nuna vida ensin ñeru.
Porque ñeru nun tenía,
Y salía a la cai namás comer
Como perru callexeru
Col cartapaciu en brazos
Fasta la mesma nueche.
Una cama de llábanes fríes,
Los pies xelaos
Y un platu de fritures rancies.
Yá atrás too queda.
El tiempu esborria´l detalle
Y ún quixera garrar lo bono y dolce.
Ún quiso, nun tiempu,
Separtase d´esos díes roinos,
Au la lluvia d´un mes siguió,
Y el suicida vientu sur
Paecía somorguialo too,
Y facer de ti una persona en ruines.
Dir lloñe yera la mio meta,
¡Yo, un ser tan llariegu!
Suañaba con países llonxanos, otros puertos.
La mar, pal que ñaz xunta ella,
Ye una puerte mui, mui grande,
Pa la tiesta que tea esmolición.
Y lloñe a naidie emportaba-y
El si naguabes pela mar
O si tiraú a la llarga nun prau
Yeres tú felice
Pelos caminos vieyos.

5.

Un día marchó´l páxaru
Pa tierres au llumaba más el sol.
Dexó atrás un corazón en soledá,
Dexó llárimes y firíes,
Dexó palabres tienres,
Dexó´l país de so.
Un día coló pal ermu,
Esi au nun medra una flor,
Y alcordábase tantu, tantu, de la flor de so
Que quixo cantar al altu, firiendo les ñubes,
Furacando esi cielu de Castía, siempre azul,
Por ver si´l canciu llegaba
Al corazón pel que sintía
Tanta y tanta señaldá.
Páxaru de grises plumes:
¿por qué colaste, de tan mala manera,
dexando atrás a la lluz que tanta querencia
y mimu te brindó?
¿Nun te convidara al so ñeru,
abriendo les sos puertes con poleyu, de par en par?
¿Nun fuera llume letible,
nun fuera´l so agua dolce como del Paraísu
un manancial?
Páxaru volanderu,
Ingratu y acelerón,
Esparaván egoísta,
Que nun vales nada.
¿Nun valíen les atenciones de so
lo que val la vida perdurable,
lo que val el vivir melgueru
lo que ye descansar depués de tar pente les brases del ifiernu.
Colaste pa contra pueblos de blancor que cegaba,
Y pente xentes que nun te dicíen nada.
El filu que te xunía col to ñeru
Yera finu y tensu,
Y d´esmenu lu fuiste a cortar.
El diablu punxo en ti les tisories,
Al diablu va tocate arrepostiar.
¿Por qué les coses surdieron como surdieron,
paxarín vagarientu?
Pémeque daquella nun sabíes volar,
Estrenabes ales, depués de tan poca llibertá,
Depués de la sofrencia en ñeros au les ales taben rotes,
Y cuando por fin atopaste unos güeyos profundos
Que se te abríen a un alma ximielga,
Cegástete de tantu y tantu esnalar.
Rápido cruciaste´l mar
De mariello trigo,
de paya seco,
de cardu agresivu y ensin vida.
Paxarín qu´atopaste un poste
Pa un poco descansar,
Paxarín que tas perdíu
Metada de nengún sitiu,
Y que güeyes dende mui lloñe
Los nubarrones qu´aporten del norte.
Al norte tornar,
Al norte, por norte naguar,
Y ellí xunta la mar brava,
Que tal como los corazones,
Nunca nun descansa,
Suañar, sueñar con emprimar de nuevo.

6.

Yá la patria, por un arrebatu perdíla.
Yera esi llar, una mar de foles poderoses,
Yera´l paséu
col corazón prendíu a otru corazón,
Llendando´l puertu en nueches parlanteres
Onde les estrelles quixeron xuntanza
De los espíritus solitarios.
Yá la oportunidá, por un arrebatu, perdida tá.
Yera un mensaxe salvíficu, una voz amiga
Que, alloriáu, dexé en mala hora esnidiar.
Yera esi paséu,
col corazón llantáu n´otru corazón,
Llendando cais valeres, siempre encharcaes.
Onde les estrelles quixeron un ñeru
Pa estes aves mayaes y rotes.
Apúrreme recuerdos, que son gratos,
Alma mía, que tantu caneyaste.
Trai d´ella una imaxe,
Daqué que mate l´escaezu.
Trai, por favor te lo pido,
Les sos pallabres,
un mechu del so pelu,
Avérame la so boca,
Enlléname col so aliendu,
Fai de la sorrisa suya un templu.
Llevanta-y, pa que tea a gustu, un cielu,
Dí-y que nun hebio nuechi,
Sin que d´ella aportare un recuerdu.
Y pensar que demientres los años
Frases sueltes, estoyos con xeitos
D´ella, siempre vivos,
siempre frescos,
Ensin garrar el polvu,
ensin facese vieyos
Añeraron nel mio sen,
removiéndome per dientru...
¿Y por qué tengo de vivir lloñe?
¿Y por qué hai milles y milles de tierra pel medio?
¿Punxe toa esa tierra yo,
punxe l´ermu, el xelu, l´esfrecer, el vientu,
too lo que separta a barcos del so puertu,
too lo que ye vida, amor y contentu?
Voi falar a les aves del cielu,
A la la ñube vagarienta,
Al misteriosu esperteyu.
Voi cunta-yos la mio hestoria,
Pa que la sepa llueu,
Ye la hestoria d´un cégaru,
de tan cégaru, violentu,
Que tenía naufragao
Nuna isla, en bederre soledá,
Y d´esmenu al güeyar salvamentu,
Envede grayar “equí, equí hai vida”,
Lo que fixo foi mirar pal suelu,
Entierrar la tiesta dientro,
D´un sable mariellu, sin vida, lentu,
Somorguiau fasta les vidayes,
Col alma pa siempre esgonciada,
Y un silenciu lentu,
Lentu,
mui lentu.

7.

¿Fixástete na fueya seco
Que´l ruidosu baraganaz
Rastra ente xigos p´abaxu
U naide más va vela
Sinón los güeyos de la memoria
Ruxidera,
que cuerre y cuerre
P´atropar lo que yá cadez de vida?
¿Nunca nun visti eses cases d´aldea
sin heriedu que les encalien otra vuelta,
nos güesos y afuracaes, podres
en ruina, ensin da-y a naide pena
pel so derribu aseláu,
por cuenta del tiempu,
el rayu
y la truena?
¿Y ye que nunca nun sintiste
el marmuriu de los muertos
en campusantu solitariu
cuando alcen les sos quexes al cielu?
Ún diz que nun tuviere tiempu d´amar,
L´otru cuenta: “siempre aporto tarde”
Y toos surden en filera a dar llercia a los ánxelos
Rabalbosos del cielu.

La yedra esguila al mio teyáu,
De nidia ñeve,
afuracáu per fuera y per dientro.
Les teles d´arañes con pelres de roxada
Tinglen como campanes nel silenciu escuru
De la mio vida, cola puerte trancada
Y el tarabicu pesllando les voces
Que surden del ifiernu secu.
Los moriecos murnios y feos,
Les vigues podreciendo,
enllenes de raxes.
Sabe Dios quién quier vivir equí,
colos calabres
De vieyes fantasíes míes,
Colos pantasmes de cuando yéremos más neños.
Un barru fumientu y prietu
Lleva señales de pisaes imposibles,
De caminos inciertos,
Aquellos que quiciás foren percorríos
N´otres dómines felices
Colos pumares restallando
De mazanes d´oru, de cancios serenos,
De abeyes coloristes con camisa de fiesta,
Rumbando y dando vives
A los vivos y a los muertos.
Nun digo que nunca nun fore felice,
Nun digo que pa min hubiere daqué de bon recuerdu,
Nun voi a engañame diciendo
Que con enfallos creyime a salvu, contentu
Pero esta casina mía
De muries febles y frañides
Va esbarrumbase al menor soplu
Y los grayíos de los demoníos
Que l´habitaben dientru
Avísenme que p´achaplase del too, llueu,
Hebíemos de quedar toos dientro.
Teo rabia y apuro a les ñubes
¿a quién soi quien causar tortoriu?
Mordíu en pechu, ensin norte
Mayáu de puvisa de caleya
Entá plantara griesca a exércitos sobrehumanos,
D´arcánxeles y diaños.
Pero vas a la guerra, alma mía,
Ablayada y con rutina,
Pero la lletra del canciu
Ta prendía nel pechu tuyu,
“Que nun sabes, que nun mereces
algamar la so sorrisa”.
Diablu d´home,
Que nun supiste ver nin tate quietu,
La casina del espíritu pacetible
Va yá pal suelu
Too lo mercaste mal
Y faltóte tiempu
Fasta pa dar l´alma
Y quedate sin tierra
Onde cayete muertu.
Ya vien el vientu xélidu
Aporta llueu al to pechu,
Y les febres blanques arramplen el muérganu
Del sangre y el movimientu.
Vas quedar fríu y secu
De la nueche vendrá ceo l´hibiernu
Col so exércitu calabres
Coles cuentes sin pagar, coles deldes
Furioses de la vida.
Pagarás lo xusto pa pasar viaxe
A un llar ayenu, extranxeru,
Onde vivir sedrá como tar muertu
Desconocíu de toos, solombra
Ensin güertu, colos fíos escaecíos,
Y les qu´amaste, siempre perdiendo.
Nun menacies más a esti pelerín
Que de viaxes y llercies yá ta mui puestu
Na faltriquera lleva pasaxes
Pa milenta chalanes al banzáu del desesperu.
El Caronte horrible y tuertu
Fiede a la llegua, inclúí dende orielles
Llonxanes, o secos puertos,
Onde m´embarcara yo
Quésiyo´l tiempu.
¿A qué voi tener yá mieu?
¿al abandonu?¿ al pasu del tiempu?
Non, voi dicítelo, home ensin xacíu,
Al erru
Al erru.
Meteríate nun furacu ente llábanes
Sinón fuera porque yá vives ellí mesmu dientru,
Presu de les tos vieyes prisiones
Rellambíu de les culiebres del to celebru.
Rellampando n´idees confuses
Escorriendo pantasmes llocos, y llocures feroces,
Ensin ver sentíu a les coses.
Pos quiciás nun tengan un res
Que dicinos elles, tan babaya ye la cadarma
Del mundu, xuegu de poetes bebíos,
De dioses cuspaces, daos a les veyures
Sin llei nin orde, sin sustancia
Dala pol vivir,
Un real nun daríes pela comedia fata
Asurdu escrementu
De xenios creadores en díis escaecibles,
Cuando debieren tase quietos.
Agora piensa, y charra
Coles formigues cuando s´aplasten baxo la to bota.
Agora pescuda por qué fixiste mal
Y por qué de tantu erru.
Hai fame de saber la verdá,
Hai lluz en gociar entá de sentimientu,
Pero la tristura ye un mar que nun s´escosa,
Un mar que m´afuega,
Me somorguia.
Ya toi atapeciendo.
Una nuea dómina vendrá.
La edá de lo nuevo.
Non la mía.

8.

Ellí debe ser tiempu
De fueyes seques,
Tiempu,
De vientu de castañes
De niebles humedoses
Y orpín serenu.
Ellí debe cayer daqué de xelada,
Y los bosques tarán roxos, verdes, pardos y en silenciu.
Ellí deben pasease les míes almes:
Pelos cantiles de Playa España y la Escalera,
Peles caleyes de Cagüeñes , Santurio, Deva,
Nos duces merenderos
Acostumaos a un díi de lluvia y otru soliyeru.
Dexé xirones de piel, vida y parzamicos
Ente la fina herba, nos regatos y nes fontes,
Ente los versos que cancien los xilgueros.
Yo debo tar perellí, ente la manzanilla
Y los pumares vieyos,
Faciendo collecha d´olives de lloreos,
A la gueta de mores nos matos
Y d´agües plateaes y pures de les fontes,
Onde vivieron otros seres ñobles y bonos.

9.

Hai nueches d´hibiernu en Xixón,
Au xibla un vientu sur malévolu,
Y la mar selemente guarda les foles
Pa cuando españe en furia,
nel so precisu momentu.
Sudorancia y lluces parlanteres,
Gotuques que chisquen en silenciu,
Pero llover, nun llueve
Y ta preparándose lo bueno,
Pero esa homedancia que trai´l cielu
Retrásase la mui lloca
Pa que´l llocu muerra llueu.
Dende que yera mocín sin barba
Siempre tristayu, pisando rayes
De El Muro en silenciu,
Güeyando páxaros canciadores
Y atisbiando escultures nes ñubes,
Yo siempre diba a xixilar la mio mar
Agora tan llonxe y perdida...
Eses tardes pacetibles,
Nes que taba murniu ensin salir de la ciudá,
En que chaba de menos dalgo
Y nun sabía´l qué
Figurábaseme qué sedría nun tar solu
Cuando contaba de los cantiles el númberu,
Y qué podría sintise si una poesía guapa
Camudada en persona
Viniera a sacate del to suañu.
Pos yera un suañu llargu, llongueru
El d´esa mocedá prolongada en silenciu
Tan solitaria inclusu cola xente alrodiu
Por nun falar con ellos el mesmu llinguaxe.
Agora sé lo que ye sintise daveres estranxeru.
Dexóme la suerte ensin mar
Y dexóme ensin lo que tantu quiero.
Magos o dioses me dieren ales
Como de gaviluetos y palombes,
Pa escargatar nos charquinos de plata
Del Muro San Llorienzu
Y pescar merucos y abrir conches
De les que guarden pelres dientro.
Oxalá pudiera pisar el sable duru
Amestáu del frescu carbón prietu
Milenta veces llaváu, pela mar
Y pel tiempu.
Que mi alma pudiera pintar güeyes
Na playa, y escribir
El to curtiu nome
Pa que lo sepian los seres aéreos:
Y que lo glayen, riendo,
Siempre felices y siempre enllenos
De la gracia valentona de los marineros.
Bañame na playa a guelpes de fola
Despeiname toes les canes al vientu
Nordés de los díes claros,
O somorguiame na nublina xelada
Del hibiernu norteñu.

10.

Perdite playa, Muro, océanu, vientu
Contigo fórense esperances, poleyos, otros tiempos.
Quedámonos varaos nel oceánu de los años
Coles sos marexaes y resaques, años
Que nun son quien a esfrecer
Tan llonxanos sentimientos.
Pos equí, tenelos, téngolos.
Tres ellos va l´espíritu,
Como un caballu sin frenu
Como un galgu picáu
Tres la solombra de lo que llevó´l mar
Tierra adientro
Tan dientro.
Onde la sequedá quixo llevame´l corazón,
Pero tampocu foi quien a ello.

11.

Qu´a vegaes muerre´l tiempu
Ya sientes que yes esi mesmu que foi ayeri,
Cuerre que te cuerre, tres del llar amigu
Que t´ufrez tenrura y amasa l´amor.
Que davezu sabes qu´ellí quedaste,
Llantáu nuna esquina, ensin el besu tan rogáu,
Pero milenta veces tresmitíu pel éter y la remembranza.
Que si el tiempu ye nun sé yo qué.
Que si hai noxu, fríu y nordés,
Borrina de tristura
Y n´alma, muncha homedancia, nin tan siquiera un clarión.
El recuerdu ye la patria, del que nun s´aparta del calor
D´esi llar que cambura güesos, entemecíos de febra
Tan fartos de dolor.
Del que sal a caniar El Muro, moyáu por dientro y fuera,
Glayando amor,
Que nun se qué diañu ye´l tiempu
Tú nun yes un pasáu, non
Yes futuru preñau de vida.
Tiempu: ye sufrencia,
Cola redruña de la perda,
la perda d´una vida,
la Gran Perda.
Entrugemos qué demontre ye´l tiempu,
Que nun lo sabes tú nin yo.
Mira, el tiempu faise de lo que nunca fiximos
El tiempu ye l´alloriu del agua pasao,
El tiempu ye la gulismia del que nun vio otro,
El tiempu ye la ceguera, l´erru, lo que non
Supo facese, cuando les coraes por embargu pidíen al alto
Ciñu y alluriu, amar ente poleyos,
Saltar perriba los charcos,
Prohibir los domingos,
Y gociar.

12.

Hai dolores grandes nel pechu
Hai espines, hai obleros
Que te dan ganes de dir pa la tumba,
Si nun ye que na tumba tas yá.

Hai sede d´un ser que nun pudo morrer
Sinón morriere l´aldu que lu viera nacer,
Pos tuvo nacencia demientres gúeyaba la espluma
De la cerveza blanca ente la mio nueche mui escura,
Y l´aldu de que se m´ averaba un ánxel,
Me dícía que taba salváu,
Qu´hebía a la fin vida y ser,
del que nun pue morrer.
Pero´l cielu igual qu´escampa, ñubla,
Y un cancallu dolce,
como zucre y miel,
llambión pa esta vagarienta abeya
tornóse al viés, y nun sé qué demontre de solombra pasó
que l´anxel qu´aprució, se fue.
Nun soi a desplicar bien ni cómo, ni por qué.
Nun caltrio´l misteriu qu´agora me fai ver
Que fui inxustu, que fui cruel,
Que´l destin gasta veyures
Pa que muerra vivu,
Pa que me pudra güei,
O al meyor ye qu´entá me falta muncho por deprender
Que a los míos años entá nun sé un res,
Que soi un perru que, a la primera, piérdese ensin cordel.
El to llamáu tien de ser misteriu,
Nun ye viaxe nel tiempu,
Nun ye llamber les firíes,
Nun ye aldovinar lo que ser nun pudo ser,
Nun ye naguar lo imposible,
Pero daqué significa,
Ensin que lo pueda entovía garrar,
Coles manes o la xixa, eso escápaseme.
Toi llocu con esta sufrencia,
Amanecer, yo nun sé si voi amanecer,
Yá nun tendré descansu.

13.

Indinu: ¿atrevísteti a enlluxir,
alma de diablu,
al ánxel qu´aportara a ti,
tan candial,
pa date salvación?
Aborrencia d´home:
¿cómo tuvisti cuayu
pa dexar pasar el cielu,
De llargU,
llarimando
y con mancaúres,
Depués de tanto arranar por él?.
Si tabes cégaru
¿nun supisti arrencender?
Si tabes sordu,
¿nun fuiste quien a sintir qu´era l´ánxel
De la to salvación?
Y ser quien a sabelo, anque fuera por aldu,
Anque zapicando dieres por fin
col so tastu de vida pura,
Anque fuera a palpu,
taramiellando pol nordés y el bastiazu,
Pero ¿cómo?
¿nun lu supiste ver?
Debíes arrincate los güeyos,
Si ye que nun pudiste ver.
Debíes frañar el corazón,
Pos nun sé pa qué lu quies.
Debíes enterrate nun furacu,
Si a quien te quiso, enterrástelu nél.
Bederre
cruel, cruel
sin derechu yá más a más gayoles,
destináu a una muerte sin xuiciu,
ensin defensa, nin reposu
pal viaxe al otru mundu,
pos un mundu perdisti.

14.

Ye como l´estrópitu del barganaz,
Que cuerre llocu pente peñes,
¡Pero nun son peñes, ye´l mio pechu!
Que nun fai sinón blincar.
El pechu míu trema, ximélgame, glaya.
Enxamás na mio vida´l pechu fuera d´esta xera a la guerra,
Enxamás esti guerreru, acostumáu a un tiempu de paz,
Reblincó asina, igual qu´ un salvax
Queriendo vengase del destín,
Naguando por matar l´erru d´ayeri n´años.
Pero ¿quies matar esi enfallu?
Ay, nin guerreru, nin nada, rapaz probe,
Esi enfallu nada lu repara yá,
Cuando hebía que tar atentu,
Peles rames fuiste, a los desiertos colaste, anda a iguar,
L´erru, horrible erru foi, matar, pudisti matar,
Aquello que fuera fondu y de fuercia espantible,
Dícente güei que ha ser regatu, estanque, paz.
Y ¿dalgo quedará d´esa agua tan pura
Que baxa de los cumales del norte?
¿Bautismu amistosu m´aportará?
La fada de güeyos fondos
Tien nes manes la varina de maxa
Cola que de nueo podeme camudar,
del sapu feu que dio malquerencia,
Cégaru de güeyos, que nun supo esperar,
Vendrá un díi como princés a arropala en suaños,
A dicir qu´él tamién sabe ser ánxel
Custodiu de la so alma
Y la so paz.

15.

Surden les duldes
De si hebo una vez la ciudá de Xixón.
Surde l´aldu de si tou esti viaxe ye, daveres, un camarzu.
De si andabes peles cais pisando charcos,
Asperando a que la tarde morriera,
A que´l suañu artificial del bar finara cola escuridá.
Y la nueche truxera un gabitu d´esperanza.
Pero nun me doi.
Hebo un tiempu confusu:
Ente rutines solitaries dalquién me dio un xirpíu,
Foi real como real ye too lo qu´una y otra vuelta se remembra.
Gayola de xirpíu, señardá d´esi rallín de lluz qu´abriera l´horizonte.
Arcu de colores que –d´esmenu- me dio color al pelleyu,
Llume nos güeyos, gociu y sol,
y camburaría pa siempres mi corada,
anque darréu´l sol, nun sé mui bien cómo, el sol se ñubló.
Anduvi lloñe, y con males entendederes.
Anduviera solu, y colos güesos somando, escuálidu
Pelos pueblos blancos más tristayos d´España,
Famiando amores, naguando la patria.
Anduviera igual qu´ un llocu, entainando too, de mala xera,
Deprendiendo lo que yera el mundu,
Escorriendo pantasmes,
Faciendo guerra,
Y quixe escaecer lo que nun ye escaecible,
Quixe alloñar lo que viera como peligru.
¿Ye peligru estes ascues roxes que a morrer nun son?
¿Pue ser malo sintiles, elles tan candiales, tan melgueres?
¿Pue ún matar presones matando remembrances?
Esti llocu d´atar, pos llocu ye´l que nun sabe lo fae, esti
Que güeyáis llarimando con tal tortoriu,
Fixo lo que nun debiera. Agayu eternu pa elli
Cayó nun charcu, pesie a tar pa tierra tan seco.
Pide perdón. Y diéronilu.
Pero cayó y cayó,
Cayó nun charcu de tierra seco.

16.

Tamién sabría encender fogueres
Ya nun pasares mal l´hibiernu.
Munches fixe nel mio prau
Pa quemar la yerba seco.
Tamién quemé trastes vieyos
Hasta les ñobles cames de los mios güelos
Que yeren de castañu, feches con ciñu,
El amor y el poleyu d´otros tiempos.
Tamién quixe camburar malos recuerdos,
Soi de los que siempre tiren p´alantre
Anque me desespere darréu.
Una foguerina habría siempre
Pal par de güeyos tienros
Qu´un día me miraron duces
Con piedá, con tientu.
Soi agradecíu, anque nun diera prebes,
Soi cálidu y soi atentu,
Yá nun me queda yerba pa quemar,
Y el prau yá nun ye míu, nun lo siego.
Toi llanzáu a tierra forastera
Escolingué l´alma nun país que nun quiero.
Si supieres de les míes manes el llinguax
Duce, que fora pa ti llariegu
Bálsamu y semencia
D´otros díis nuevos.
Si pensares que nun soi calabre,
Una triba de desechu,
Sinón dalquién que echa de menos.
Que´l silenciu nun fuera frialdá
Sinón más bien mieu, y más mieu
A querer,
nada más qu´eso.

17.

Ven conmigo, llueu,
Princesa de los mios sueños;
Fai como si non te hubiera perdío
Fai como si non esistiere´l tiempu.
Ven de la mio mano
Garradina per esti caleyu:
Ún que baxa tres de mio casa
Cásique dica la mar, al pedreru.
Hai en Quintes un prau
De manzanilles arumoses
Pindiu y grande, onde toi yo entá
Dacuando yera neñu.
Quiero amosate a esi yo
Con tomatinos roxos nos papos,
El pelu sin canes y llisu
La piel blanca como llechi
Y sin saber nada de lo que vendría llueu.
El neñu que yera yo,
Prestábame que pudieras conocelu.
Mui fantásticu, d´imáxenes llenu.
Veríes lo que a elli inda m´asemeyo
Doime davezu entrega
A fantasíes, a ensoñamientos.
Fíxeme grande, pero soi neñu,
Que suaña nun tar tan solu
Y umbaxu´l sol quier acostase ceo
En lechu de fueyes y yerba
Coronáu de los tos guedeyos.
Habrá soles en firmamentu
Alrodiu habrá planetas xirando,
Pero la llume que me da vida
Y me dexa davezu cégaru
Ye esi collor d´oro de la to alma
Esi alborecer de sentimientos:
Yo nunca nun sintiera eso,
con tala brenga,
Con talu fueu.
Ven conmigo al prau pindiu,
Por favor, te lo ruego.

18.

Di-y, espíritu mensaxeru
De los pínfanos escuros,
Di-y esto que te digo:
Cayí va munchos años
Delles llengües baxo tierra.
Metíme en suétanu escuru,
Ye verdá,
Non por gustu,
Sinón por entrega.
Ví equí horrendos calabres,
Ví homildoses bisarmes
Y foses sangrines de muertos.
Ente elles taba yo,
Créeme, espíritu del abisu,
Ví´l mio retratu n´ellos.
Demientres cayía,
Arrastráu por quésiyo qué impulsu,
Y débiles voces sintía
Y xuxuriaben pente´l mosguín de les piedres:
“¡Esti nun ye´l to mundiu!”
pero cayer, cayía
Y les cuerdes y cadenes amarraben el cuerpu.
¡Qué frío fae equí abaxu,
sobre manera si cayes esnudu,
a una tumba del Tiempu!
Tremar ye vivir,
Y si desees la vida,
El caberu xirpíu
De ver a la Muerte los caniles encarnaos
Faete escaecer.
Di-y, espíritu mensaxeru,
Qu´anque cayera nun triste furacu,
El querer nun sabe de piedres y tierra
De la que se pue poner en medio,
Que si fixe dañu,
Que si´l dañu yá ta fechu,
Nin el Tiempu, nin el diañu,
Nin la Muerte nin les tumbes
Son quien a quitame al menos el pensamientu.
Metanes la escuridá
Neto nuna tumba bien fonda
Vivo equí, lloñe de la patria
Verde, con casina blanca.
Pero unos rayos de llume,
Un calecer vivu, una imaxe candial
Percórreme davezu´l recuerdu.
Ye´l reguerín mesmo de la mio sangre
El mesmu que percorrerá´l cuerpu de so, tan bella.
Ye la risa del destín
Faceme saber que tapié cruel una puerta,
A un mundu floríu y soleyeru

19.

Hai caleyes perdíes
Ente biesques y matos,
Au siempre diba con mieos
Por ver si nuna revuelta
Apaecíaseme daqué, tamién perdío
Nun sé si nel espaciu o quiciás nel tiempu.
Abrasárenme los artos
Na vida colos sos crueles obleros,
Surdíen al pasu sacaveres,
Escalamuertos,
Culiebres
Y vieyos pantasmes
De los que ríen pa dientro
Y apodérense del alma
Y la esanicien selemente,
Cásique como royedores de güesos.
Yo chábame p´alantre,
Que la impaciencia me frayaba,
Que la vida se me diba
Y nun yera yo a ello,
Nun yera quien a salir
D´esi Xixón negro,
De llargues nueches sin aliendu,
De tiempu invertíu de futuru
Pero sin suerte, sin gayoles,
Namás que remando en contra´l vientu.
Caleyaba viviendo de mores,
Mirúendanos y demás frutos selvaxes,
Y un pocu selvaxe volvíame yo llueu,
Fartu d´esperar, impaciente
Por dexar de ser neñu.
Y la paz nun me vinía,
Y les tregües metíales en bolsillu
Que les monedes cayeron peles alcantarilles
Y peles barres de bares muertos.
Piqué a dalgunes puertes,
Y focicos foscos rempondieron.
Abrí´l corazón de mio,
Tantu, tantu tiempu polvorientu,
Y camudé la cara y el xeitu
Tornándome inquietu y valiente,
Yo, que nada nun tenía de guerreru.
Agora tengo na costalada
Llances y saetes, firíes y marques,
D´esi tiempu de baturiciu,
D´esa dómina d´erros,
De lluches y quereres.
Agora creía ser pacetible,
Home llariegu,
Un poco más tiesu.
Pero cuando pienso nel corazón perdíu
Un puñu gárrame el mio pechu
Taramiellando glayo en silenciu
Póngome entá enfermu.
¿Por qué nun quixeron les pallabres
esnalar lloñe, nidio y entainando,
pa xuntar lo que los dioses
xuniríen con gustu d´esmenu?

20.

La nueche aporta al alma
Morrebunda anque xóven,
Al alma que ñaz ensin aliendu,
Escuálida de formes
Valera d´ilusión
Cadeciendo ganes de xubir
Al cielu au la llamaren
Un día nel qu´un ánxel glayó.
La nueche vien, y ¿yá nun sabes alma,
Que lo que nun foi yá nun pudo ser?.
La nueche ye esfrecer y tremar,
Ye burlla del vivir
Si vivir vivióse otres vegaes.
Porque l´ánxel glayó
Pero taba n´alto y lloñe
Y les voces nun se comprendíen
Nin les paroles viníen nidies.
La nueche ye esfrecer y tremar,
Y l´ifiernu ye tar solu.
Nun paez pecáu naguar al ánxel,
Con ales, tan guapu y llibre.
Nun ye crimen arranar la so sorrisa,
Perdía amunchayá,
Imposible d´escaecer.
Pero xube del cantil un mantu espesu
Escosando la lluz y barriendo flores.
Ye´l tiempu, ñublina de la vida,
El que surde cabo la mar
Frañendo ilusiones, y matando futuros,
Ye´l tiempu que nagua por borriar
Alcordances de fierro, a fierro marcaes,
Ye´l tiempu col que nun pues falar,
Pidiendo favores nin tornes
Pal día d´ayeri, escuru y llonxanu,
Pero qu´escuende al ánxel que yo quiero.
De la mar xube la escuridá,
De los montes, melenes de tormentu,
Fardeles de recuerdos, homedancies y llamentos,
Y del regatín, tamién llamentos
Y de la pequeña biesca, llamentos
Y tamién llamentos quexosos
De los mios dos pumares muertos,
De los vasos que vacié,
En bares desiertos.
Apúrrenme dende les ñubes
Formes escaecíes
Del pasáu, monumentos
U tan los güesos dexaos
Pa echar tierra penrriba d´ellos.
Qué tarde supe, na seronda, yá vieyu
Que habríes mui bien podido ser mi estru,
Mi canciu de ca alborada,
Mi patria, mio llar, el mio bon techu,
Ximielga alma, sofitu feliz
Pal día gris
Pala nueche de rellampos
Pal caminar sele de nueo
Faza´l sitiu onde ñacemos.

21.

Pero quédame´l recuerdu,
Mas el recuerdu nun ye abondo
Pa teneme en pie
Y garrar brenga
O coyer puxu
P´aguantar un día nueu.
Pero quedar, quédenme imaxes
Que tortorien el cuerpu por dientru,
Y en suaños pierdo pie
Na llamuerga escuridá del tiempu,
Y el tiempu va y dizme:
Pa dientro, pa dientro.
Que yo recuerdos namái nun quiero,
Que los recuerdos muérdenme de xuro
Y como fiera xabaz con fame
Fainme afandu,
afálenme con obleros,
Métenme n´escuros furacos
Y devórenme sele,
Con sangrín enfotu.
Habéis de dicime, flores del campu,
Si ha tar ella ente vosotres,
Habéis d´avisame raitanucos,
Si hai ales nueves nos cielos,
Si hai marmuriu nuevu en regatos,
Si nes voces del vientu,
dízse daqué nuevo,
Un no sé qué,
daqué difierente
Qu´avise que ye un mundu nuevu
Onde antigües distancies se frañen
Onde la vida entamare llueu
Y camudaren en fueya seco
Too lo que fixo la distancia y el mieu.
Fueya pa pisar sonce,
Pela alameda de musgu y felechos
Ente muries antigües y praos de verdor,
Qu´arumen como paradisos norteños
Enllenos de vida, agua y fermosura,
Au pisar la herba ye pisar el cielu,
Y el cielu mesmu, tea d´oru o gris,
Seya espeyu de los sos fíos bonos,
Felices pa siempres.

22.

Escontra estes cais en soledá,
Y estos cimenterios de secano
Onde la mio alma vagarienta
Siempre -por condena- sedrá estranxera,
Estrapayo la mio estrañedá
Y fraño los ñudiellos a guelpes.
Les blanques muries de cases
Con rexes de fierro agresivu
Fálenme a glayíos que toi lloñe
Del mio llar tienru.
Los pueblos encalaos y tristayos
En muertu pigazu eternu,
Dícenme qu´hai muches milles de tierra
Ente nós de por medio.
Marmuriu d´un esiliau
Que quixo l´esiliu
y quixo sorbiar el tiempu,
Ye marmuriu que nun val
Pa comencer a naide,
P´axetiguar mancaúres y erros.
Naide me diz nada
De toos soi estranxeru,
Falo como ellos, pero nun m´entienden,
O soi yo, el que yá nun m´entiendo.
Naguo por saber de ti, Asturies
Pero ta la voz tan llonxana
Que ún precisare esnalar penriba llanures,
Montes y ríos, pa llegar ellí llueu.
Yá nun toco pie nestes cais del ifiernu,
Too paezme mal iguao,
Tristura, murnia, fealdá.
Tengo fame de rostros pacetibles,
De verdures, pumares en flor, de biltos tienros,
Tengo sede de caleyes, de rises en prau,
De lletura de llibros buenos,
De playes esplumoses,
Del bramar de la mar,
Del canciu de gaviluetes lloques,
Del airín setembreru,
De la galerna furiosa,
De la truena d´aldea,
que te pilla d´esmenu,
de la bondá de les xentes
y d´encontrate ente cucos d´herba seco.
Figúrome alcontrate,
Xugando como neños.
Hai daqué escondío
Nesos güeyos profundos,
Dalgo que nun soi a caltriar
Como si de la vida fores misteriu.
Pémeque foiste parte de min,
Enantes de apurrinos traxes de mortales
Y caleyar a ciegues per estes veredes
Enllenes de torgues y charcos.
Debisti falar alto y claro,
Como dacuando sabes facelo.
Agora... nunca ye tarde si ye falar sincero
Pero les caleyes sedríen quiciás otres,
Y too a toos se nos fai estranxero.

23.

Trema la mano
Al escribir, y nun acierta
¿Qué foi de nós?
¿Qué foi, cuando el pasu
del tiempu apreta,
y el reló emprima la carrera
contra la esanición completa?
¿De cuántos calendarios fixiste con ellos lleña?
Ún tres otro, llambíos peles ascues
De los años mozos,
Y cola seña na vidaya,
La que diz: “too llega”.
Yá nun igues los erros,
Yá too ye yesca,
Yá too cambura sele,
O rápido, sigún venga.
Vives d´alcordances,
Vives d´emprestao´l presente,
Un día, al nun prestate´l güei
nin tan siquier un res,
Pidíste-y al ayeri una semeya.
Dixiste-y, en silenciu ya en secretu:
“Ayeri amargu, déxame tar ellí”.
La semeya de papel, y toes les cartes frañides tan,
Pero la imaxe entá tien una brenga,
Que te fai llarimar en cuantes apaeza,
Y esta señardosa patria ye onde quiero yo vivir
Y entregame al so recuerdu veneráu,
Al tiempu aquel en que les roses falaben
Y nes orielles marines hebía voces
De serenes, vigulines, gaviluetes,
Campanes de trunfu del cariñu,
Amistá de la bona, de la que conocen solitarios
Corazones que nalaron en tiñebles,
Que cruciaron na escura nublina
Y fuxeron -sin cayer llocos-
De demonios y torgues de la vida.
Pos la vida llanta trampes
Pon fierro nes puntes de les fleches
Y envelena el so mordigañu atroz
Cuando va xurate vengación,
Y dizte que nada pue surdir del bien too,
Que si una vez deprendiste a querer,
Otra vegada has escaecer el llinguax
De les caparines qu´esnalado lu falen
Enantes de dir a morrer al delláu de l´amada.
Esi raru llinguaxe de les almes curaes
Que van a la gueta de fontes inmortales
Y saben sorbiar l´arume de los castaños,
Y preben bébores en cazuelines tiraes pel suelu.
Onde los enanos conviden al viaxeru tristayu,
Poblador d´ocalitales musicales
Que xinten el nordés coles sos boquiaes fragantes
Y nunca nun entierren del too los raigaños
Pa facer zapicar al llocu pasiante,
Que desespera d´aiciones pasaes.
Esi collaciu de güestia infame, medio muertu yá
Clamiando pel pasáu rotu de mala manera,
Ye pastu pa fogueres perdíes
Y roína bisarma escuálida a mediu esfrecer,
Enantes de dilíse del too ente´l fumu y la negrura
Amaleciendo d´una febre que nun tien melecina,
Malapenes somorguiase pel volcán
De sentimientos ensin salida,
De pasiones ensin desfueu,
Que cocinen dientro, selemente con zufre
Y mala amestadura de fracasu
Y amarguriu.

24.

Rescampla güei lo mal qu´andares
A la gueta de ñeros onde arropase,
Y milenta estrelles indines conxuráronse
Pa tener tú un destín ensin consolencia.
Cayíste mayáu d´esnalar contra´l vientu.
Ties l´alma frañida, y nun yes quien atopar un ventán
Al campu verde que t´añó dende enantes de ñacer.
La voz llonxana recuérdate´l paradisu u surdíste,
Y amorir quixeres por nun tar ellí nes biesques
Homedoses, felpeyos de verdor y fueya sueco.
Dime voz, que tantos años aselaste, voz mudina, voz de vida
Dime qué se pue facer pa desfacer lo yá fecho,
Qué hai nel futuru, aparte de tumbes ya silencios.
Dime voz, duce voz d´un pasáu camudando en güei,
Si nun taremos riendo ente carbayos y castaños,
Atropando mores nos artos, y glayando camín de les playes,
Si nun taremos como bisarmes faciendo lo que nun fiximos.
Pos ente dambos hai más d´ausencies y silencios
Que folixes daveres, que ruempan la tristura como ríos
Frañendo trabancos, llenando banzaos y escosando mares
De ciños, caricies, cosquielles, poleyos.
Dime voz, si yo pudiera facer daqué
Si miagar perdones y ruemper en llamentos
Val poca cosa, y la cosa nun tien remediu
Si hai que recurrir a la maxa, al suañu, al cielu,
A toes les potestaes del firmamentu
Rogando que por lo que más quieran
Tea la voz de so, na mio oreya.

25.

Tarrezo viaxar al cabu au diera en fallu
Les míes travesíes, a mercé del vientu,
M´ablaya de más tornar al tiempu, escuru tiempu,
Au fallé y tremare´l cascu del mio podre barcu.
Garraba´l timón pa facer frente a los vientos
De la camudanza de la vida, tan falta de lóxica
Nada nidia, non pescudable, tan poco sólida...
El barcu nun querría falar del viaxe, sinón tirar p´alantre,
El patrón nun yera avezáu a les travesíes llonxanes,
Paecía-y un alborecer lo que nun yeren más que rellampos vieyos
Nuna nueche de tristura, que rastraba bien d´atrás.
Hai sinos nel cielu que debiste achisbar, marinu sin costume
De facete al océanu de les aventures propies.
Debiste aparar la mirada naquel solín d´oru que lloñe aguardaba.
Creyiste que yera sol namaí,
Y que´l so altor nun yera pa los tos miembros
Ser quien a alcanzar y asina
allumavos xuntos, sol y barcu,
Cielu y agua, dica puertu seguru.
Creyiste que nun dibes ser quien atrayelu
-solín d´oru, mi alma-
A la to confusa sencia,
Pensando que yera solo cometa,
Aportáu d´otres galaxes y querencies.
Y, dime, capitan de barcu sin cascu,
¿Cuánto nun dieres como llocu
Por llevar el sol a casa
Por dar calor al to camarote ranciu de tables con foroña,
Por da-y color a esi oru qu´entá brilla nel recuerdu?
Hubieres tenío guía, y allegría eterna,
Y la lluz que se te abría, hubiera fecho contigo
La travesía entera.
Agora lo sabes, siempre tarde hai mester de conocelo.
El to destín ye ser serondiegu
A lo meyor ye una preba d´un dios burllón
Pa saber si yes quien atropar la Itaca verde, con pumares,
Que mercares tan mal y tan apriesa.
A lo meyor esi sol del que te falo,
Sigue texe que texe
Nuna casina de madera
Ente biesques y xeranios
Esperándote una vida entera.
Dexástela sola, pamidea, ente los árboles, cantiles y regueros
De los díis d´Asturies lluviosa,
Y el so canciu misteriosu tien de tresportar mensaxe
D´otres vides que na vida se perdieron.
Agarráu a tables rotes ente pedreros,
Perdíu na mar de tierra seco
D´espaldes al puertumar que güeyó la to nacencia,
Aportóte esi mensaxe nuevo:
Ye un canciu seliquino, tranquilu versu amistosu,
Lo que fai medrar el misteriu.
Tiénesla por diosa, y ye la so serena maxestá
La fonte de toes les tos entrugues.
Réces-y, aóresla, patria
Y ella por costume calla.
Pero tan serena y parca en pallabres, da nostante calor y afectu,
Y paez que siempre alza les palmes abiertes y franques.
Si ye diosa, mui humana ha ser, pos invita a convidar tenrura,
A da-y abrazu, a brindar el so cuerpu pa calecer ducemente
Y xura-y nun la dexar más sola.
Esi ser –Asturies- falóte nel naufraxu,
Y la voz aporta tantu tiempu darréu,
Cruciando páramos y desiertos.
Costarate refacer los xirones del recuerdu,
Dolíu de les tos mesmes crueldaes,
Y del sol atapecíu
Eclise por ti fechu,
Marinu de les llanures.

26.

Esti pelerín que viaxó llonxe
Va llenate la casa de versos
A falta de pétalos sonces pa pisar
El camín al to divinu estru.
Esti vagarientu perdíu nel tiempu
Nagua porque les palabres al vientu
Sean quien pa que nun pises suelu
Y esnales nel to llar, y me teas ehí dientro
Anque seya na memoria, anque sea formientu
Prestu pa otros díes meyores, de lluz esplendente
Au los ramos de flores, envede versos,
Aporten como bonos díes.
Esti pelerín empobinó por rares siendes
Tres de los montes de la so terremota neñez,
Crució un mar que dicen d´oru
Anque pa él fore de cardu secu, violentu.
Esti probe desalmáu, cayó nun pueblu de cégaru blancor
Onde ni les pantasmes cabíen dientru,
Al venir l´hibiernu xélidu
A nomalu, pa siempre, forasteru.
Nun sé que día satu perdíte,
Quiciás vieno de llonxe, de antigües torcedures
Que les Parques fixeron
Al texer destinos estraños
Y dexuncir lo que xunce l´home.
Ye l´esborriar cruel del tiempu,
Ye lo que taba fecho a fueu d´atrás.
Pero de xuru que nunca te dixeron “amigu” nestos paraxes
Llanos, sin vida, sin aliendu.
Raigón feble´l que chaste, arbolín d´otres latitudes.
Solo podíes falar, les más de les veces, al putu vientu.
Esos díes terribles, de nubes infinites
Y televisores vieyos durmiendo nes cunetes,
Ente galgos famientos, del diablu reencarnaos,
Y pistes de tierra baxo estrelles,
Nada ente elles y el to apartamientu.
Solu, solu tuvisti munchu tiempu.
Y la patria refugada, tou esi malditu camín
Andau a zapicones, palpuñando cayides y xigos
Mancando sangrinos los muslos
Sobre tierra y cementu.
¿Teníes l ´arguyu feríu, rabalbu neciu?
Pa min garrábaste en recuerdu a la nueche confusa
Esiliáu por voluntá propia, del so candial reinu,
Vagaste, vagaste, más y más llonxanu vagar neciu.
Aquella nueche en qu´aprovecíes,
Metíu ente alcohol y tortoriu,

27.

Marchar llonxe, pa llueu naguar
La patria de to, y el rostru amigu,
El resto de los toos díes
Morriendo entrín cayen nueves serondes
Como fueyes de los árboles mayucos
D´una vida que se va esnidiando.
Marchar llonxe pa miagar pel pasáu
Onde amaste per primer vez
Anque tabes fartu de dar tumbos...
Ún ye d´onde sintió davereres l´aldu
De los barquinos entemeciéndose
Averaos al mar Cantábricu.
Marchar llonxe ye entamar funerales
De la vida perdida, que yá nun s´alcuentra
Ente estoyos de ropa vieyo y apuntes
Tomaos con desgaya y afandu, notra dómina irreal
Por llonxana ya imposible
Por llonxana.
Marchar llonxe ye fuxir
Y dexar sangrín recuerdu con ello,
Tú que pensabes que nun emportabes
Y a naide causaríes esmolición,
Probe vagarientu fuxiste nel intre
Sin quedate y llevantar casina
Ente matos de sanxuaninos siempre verdes.
Marchaste y too quedó pel suelu
Tiráu al alto, ensin curiase de nada,
Dando un feu portazu.
El mal ye nun saber ver,
Que´l que nun sabe ye como´l que nun ve,
Y ver, viste permal,
En tiempu de tantes camudances
Nun tuviste quietu construyendo patria
Envede abandonala...

28.

Tamos arrincaos del mundiu
Tumbaos a la llarga d´una cuneta.
Fiximos un viaxe diverxente
Na tómbola un día de folixa.
Esi carrusel da vueltes y más vueltes
A la gueta d´un destín que nunca nun llega.
Tien de ser abegoso salir al prau de fiesta
Ensin llume nin cazu d´estrelles llumando al norte.
Debíen prohibir a les almes inespertes
Salir al debalu ente biesques y artos
Col arcu cargáu de saetes cégares,
Glayando cazadores en soledaes profundes.
Debíen tar en xaules
Eses almes nacíes pa mancar colos sos disparos
Emburriando como zotes con ales
La guapura na nueche secreta
Qu´en veranu pide serenidá y descansu
Tebiu pal que siempre viviera en griesca.
Si foiste alma zapicando
Ente caleyes, enllena de fame y fríu,
Y si fixiste veyures y maldaes
Dí a la brisa nocherniega,
Glaya al maxestuosu nordés, amigu vieyu
Que nun yera esi to porgüeyu.
Nun ye malu l´espíritu xabaz
Vagarientu,
famientu,
A piques d´esfrecer.
El so corazón hebía de ser bono
Si enantes
Lu hubieren atendido
Con ciñu
Nun llarín amistosu.

29.

Asturies, tú nun mereces
Que Patria Chica te nomen,
Pos ye pergrande´l corazón de to,
Y fondes y antigües les coraes de prieto
Y bultable guapu verdor.
Hai milenta merucos y sapos,
D´homes con xacíu antroxaos,
Que dicen falar nel to nome
Y nunca-yos aportara a ellos
El to divinu aire de mar y monte
De xente ñoble y con brenga
Surdida d´un pueblu que nun se da
Y nun sabe dicir “entrégome”.
Asturies, yo sé que nun mereces
Tantes mancaúres nin desprecios,
Rir, rínse de tí y nun saben lo que ye´l fueu
Pa xugar, misteriosu elementu
Pa camburar al roin afogador.
Fueu de les altes cumales
Y del mar bravu, violentu,
Tas somorguiada Asturies,
Nun triste pigazu lentu,
Invócote, anque esti fiyu tuyu
Tea llonxe
Y coles manes ataes:
Invócote pal nueu despertigar.
Aporta´l momentu.
Esti momentu.

30.

Quedóse dientro
Xorreciendo en forma mapoles
De les que duren un intre
Pa ruemper llueu en truena
Y xabaces rellampos.
Nes esquines quedó
Nos requexos con telarañes,
En papeles arrugaos
En cartes tiraes a la basoria.
Lo que nun surde, y nun fue real
Tórnase vientu de xelo
Engrispáu y violentu
Que cuerre y muerde
Que te sapoza dientro
D´una urna de fríu vidro
P´amosar nos museos.
Pero los dioses del firmamentu saben
Que-y lu díste al cielu
Al aire, al vientu, al éter sagráu
Au moren seres anxélicos,
Que´l besu surdió de los llabios
Y esnala llonxe cada díi
Fasta les duces mexelles que lu atrayeron.
Esi besu nun sé si quedara atrapáu ente ñubes
O entaramingau nos deos
D´un xeniu invisible
O d´un inotu elementu aéreu
Puestu en medio.
Pos daqué púnxose en medio
Y la xixa nun algama a sabelo.
Ellí parose too, paró´l tiempu,
Y la vida dende entós foi suañu,
Un suañu llentu,
Mui llentu.

31

Desplicar quiero,
Les coses qu´asocedieron.
Quiciás desplicar seya arguyu valeru
Cuando entrugues pel destín de la fueya seco,
De la gota de roxada,
Del cruxir de les cóncares de cascudos
Pisaos baxo la inorante bota en día d´orpín.
¿Qué foi de toos esos arbolinos
que llantaste nel prau de la to memoria,
Y que solo s´alcen nel furacu d´otru ser
Que yá nun te reconoz?
Vinieron galernes y bastiazos
Y riaes sucies llevaron la casa
Prau abaxu fasta´l pedreru.
Daqué tuyo flotará agora n´alta mar.

32.

Varaos na mar. Dime ¿por qué nun sopla´l vientu?
Nun vien la fola, la mar acháplase y nun fala
El so bravu llinguax, canciu terrible y cuspaz.
Varaos na mar. Mando mensaxes en botelles:
En ca vidru hai un corazón de mio, engueltu en palabres
Que envede duces, son del agrín amargurientu
De too aquello que na vida nun salió bien.
Esti ye otru vidru verde, gordu y miope:
Aguantará los mordigaños de pexes escaecibles
Y los guelpes escontra les roques de costes argutes.
El mensaxeru diz milenta coses. Debe tar alloriando,
O quiciabes amoriendo. Da-y lo mesmo
Lo que d´elli piensen. Namái sincerase,
Fala-y al vientu y que les ondes lu tresporten
A una patria y unos díes que lu quixeron.
Si ha ser muertu, ingrávidu y al cuellu de les gulundrines
Que seya como los dioses tean dimpuesto.
Si´l naúfragu ta de más nuna isla tan pequeña
Y él nun ye quien a metese dientro
D´una de les botelles mensaxeres, pos ye grande
El so dolor. Infinitu como les foles d´otros tiempos.
Bien de veces les güeyara, dende la baranda, dende neñu.
Bien de veces apuntaba´l deu al mar y dicía
“¿Qué habrá alló dientru?”.
Neñu grande, has saber que´l mar nun tien dientro,
Que too él ye un infinitu onde perdese
Y quedar varáu lloñe del corazón xemelu.
Si triste ye nun dar con él,
Más triste ye un día velu,
Y como nes más horribles velees
Saber qu´un barganaz soterrániu d´él va separtándote
Y separtando lo más lletible, lo más tienro.
Y un trapín blancu
Ximielgándose llueu,
Señala qu´alló nel norte
Quedó varada esa lluz
Que naciera p´allumate nes escuridaes de la vida.
¿Pa qué esistirás?
Tas frañéndote´l pechu.
Escribes estes llocaes
Y nun sabes si vas a morrer
Faciéndolo.
Si pedir perdón
Milenta veces ye bono.
Si espardir sinceridaes a diariu
Ye sano pal universu.
Si tantu esnudate
tien de ser semenciu
d´otros díes,
d´otres travesíes pela mar
amosando que tas vivu entá.
Pero vivir ye tar morriendo.
Y nun te van a dar otra vuelta,
Lo que perdieres a cencielles.
Los tiempos camudaron
yá nun van a degolvete eso.
Hubo
Mar de tierra
Mar de por medio

33.

Frañeme l´alma, aproveciendo sofitu
D´un corazón ñoble, que de min nun se riera.
Ciscara en cachos l´espíritu indivisible
Naguando´l ñeru donde me diera ciñu
Un alma ñoble, fuerte y sana
Pa min xorrecer a la vida nuevo
Y entamu d´allegríes infinites,
como restallen en collores
Les flores en primavera.
¿Qué asocedió, home de vidro,
Que nun aciertes a recoyer los tos cachos?
Yo nun lo sé. Dare-y vueltes al ayeri,
Entrugaré al mundiu a grandes voces,
Garrándolu peles solapes,
Condergaré al dios y al diañu,
Maldeciré a les coraes de la Tierra,
Pero nun sé lo que me separtó
D´esa gayola serena y plena.
Que ye tan abegoso atopar a la vida
Xacíu y ganes de vivila
Depués d´haber fecho dañu
A la cazumbre mesma de la to sencia
A la gueta de paz feliz, mancar
Al sangre que riega al alma
Al raigón mesmu de tou esistir,
Tú, que vagarientu guetabes la fonte
D´esi elisir eternu,
D´esi cálice de salú y brenga.
Dende güei quiero glayar al cielu
Que me pesa n´alma lo que fixe,
Que´l mio pesar yá nun tendrá remediu,
Que voi morriendo a modu.
Pa min el mundu yá nun sedrá´l mesmu,
Sedrá un llugar distintu,
ariau,
ermu,
l´escenariu d´una obra inacabada
por falta d´actores y de llibretu,
au l´autor marchó como borrachu
escaeciendo l´argumentu,
entemeciendo realidaes y veyures
d´un escritor neciu,
zapicando pente esos mundos de Dios,
de los que nin Dios sabe a qué cuentu
facer mundos ensin xacíu,
coles hestories acabaes enantes d´entamar.
Pos entamar hai que facelo,
Fasta pa rispir hai que dar pasos,
Y cuando emprimaste a dar el primeru
Zapicaste escontra una muria
Del to propiu deséu.
Malditu de dioses y homes,
Malditu tú, el primeru,
Nun sabíes lo que facíes,
Debíes tar cégaru.
Entós aportara too llueu:
Naide clamió por tí dende´l norteñu horizonte
Abandonáu pel mar y los sos claros güeyos,
Si tú te colaste, qué quiés,
¿que vengan a por tí llueu?
Tas rotu nel alma.
Rotu agora por sabelo.
Ay, pero nun pue ser vengación.
Non: la vengación aporta de manes de les Parques
Horribles que s´escuenden nes nueches solitaries.
Pacetible quixiste siempre ser
Pero los disgustos añeren onde menos esperes,
Como los trasgos rebullendo ente la lleña,
Y d´esmenu esi calorín amburante
Desfuégase nun terrible fueu
Qu´estroza casa y frutales,
caricies y deseos.
Amás de pacetible, preciábeste de ser bonu
Y los bonos nun faen dolor
Nin quemen almes de la so mesma sencia.
Llibrinos, praos verdes, casina d´aldea,
¿qué pocu más hebía de pidise
pa esfrutar de lo que mos queda
vivos nesti mundu llarimosu,
nin tan siquieramente eso que nomé
más bien besos de mañana, almuerzu y nueche,
pos d´ellos namái podría vivise como formientu
d´una vida braera, cenciella y tierna.
Maldígome, serenu y con concenxa,
Maldigo´l nome d´esti mal poeta
Mazana podrida de los vates
Cayía d´un pumar foroñosu
D´un prau en venta
Dende que se fixo´l mundu.
¿A ver a ónde van aparar los tos versos
caricatura de demiurgu
de mundos fechos de lletra muerta
como los espíritus d´una llei feble
que´l mundu mesmu y tou dios iñora,
espantible sentencia capital
y palabreríu valeru
cadeciendo de sentíu?
¡Que vas facer con esa riestra de paroles vieyes,
parzamicos gastaos,
factures ensin pagar,
faltriqueres vacíes y necies,
mazcaritos risibles d´un antroxu perpetuu!
Perfeutu estrozador de la vida propia y ayena
Más valía ser albuertu sin promesa.
Xacer quiero baxo les estrelles
Por ver si ente elles el rostru amigu
Torna a sorrime otra vuelta.
Dirá qu´amalecer y tar a un paso de ser llocu
Ye parte de la mio sencia,
Tristaya y non pescudable.
Nun ye asina.
Entá soi cuerdu.
Ye que me pesa.
Me pesa n´alma.
Me pesa.

34.

Los años fuxeron
En rápidos trenes, veloces
En páramos mariellos, siempre secos
De vida, enllenos de tristura.
Los domingos m´achaplaron llueu
Como los seis díes que darréu cuerren
Llocos a morrer de vieyos.
Yo recuerdo estes cais valeres
Con papeles y basoria revoltiando
En torbolinos grises d´una ciudá ensin alma,
Nun furacu de cementu que nunca fuera míu.
Cuánta vida marafundióse suañando tornar al mar
Y cuántu rispir por iguar la mio vida
Nel puntu en que la dexara d´un portazu
Tan de melodrama baratu, que´l preciu
Hube de ponelu yo mesmo,
Frañendo´l corazón, yá tan llonxanu,
Que yera´l mi bombéu contino, barganaz
Siempre vivu qu´a min m´arreflundíera
Con ganes renovaes de coyer flores
D´un mundu nueu, fechu primavera.
Y les flores musties tan n´alacena,
Paecen de papel seco
Como fueya frañediza d´una llamera cayida
Cuando´l fríu de la vida escuca al home
A piques de camudase en braeru calabre,
Como xelu llerciosu que achisba nel monte
Llistu pa saltar como fiera apavoriante al llocu
Pelerín que nun caltriara la profunda maldá del tiempu
Cuando estiende garres llargues
Y ablucantes caniles
A la desprevenía pieza,
Pos ye´l tiempu cazador
Que conxela al animalín sonce y cenciellu
Perdíu nuna estraña biesca.
Pero, mira, home perdíu en páramu secu
Pa tí nun hai garra de tiempu sangrín
Nin caniles estrozadores.
Too lo vives como si ayeri mesmu caminares
Ente barques y gaviluetes,
Como si la mar de los años nun traxera vagamar odiosa.
Caníbal de corazones y querencies,
Sigues siendo entá aquel mozu famientu de ropaxe
D´almes iguales a les suyes
Y poleyos de güeyos profundos.
Too en tí sigue sin camudar,
Anque too al rodiu ta puesto en medio.

********************************