Taramiella, lluz d´agostu
Taramiella, lluz d´agostu,
Anocha, qu´eso te queda,
Y trata con ciñu les míes velees,
Les que yá nun son suaños siquiera.
Bailla, estrella de malu vagar:
Sabedora d´unos branos
Margurientos enforma,
Nun fechos de xuru pa ti.
Caniarás por siendes,
Caleyes de puvisa,
Biesques abisíes,
Y llamuergues enllenes
De calabres sin recuerdos.
Atrás quedóse´l tiempu
De vacaciones llargues
Y hores llibres a cuentu risa.
Sentáu énte la mar
Ociosu a ver pirates aportar,
Apurriendo sonces instantes
A la cuenta del tiempu escaecíu.
Acábase too sacantes alcordar
Pente escayos y sostrapaes
Una vida feble, sin xacíu.
Vida que namá ye rispir
Por un suañu descomanáu,
Como suañu d´otru home
Que nun yera yo, non...
Un raru suañu
Como d´habitante de país llonxanu
Qu´un día marchare ensin memoria
Del llar onde dio los pasos primeros.
Esbilla
del.icio.us