N´espíritu
Véilu ehí, n´espíritu
Pisando´l sable moyao.
Paez qu´escribe pallabres
Pa que les esborrie la suba
De la marea, tan puntual,
Y el mar, profundu, les llea yá dientru
Baxo les partícules d´agua y salitre,
Abrazando´l sentíu secretu
Nun abellugu que seya quien a esfrecer
Lo escrito dende l´alma con sede:
Nun hai mares que-y llibren
Al esiliáu de tanta cárcele que lleva consigo...
Y voces: metíense-y nos oyíos
Talmente como pantasmes
Rebiltando pente les tumbes
Espardiendo l´axorizu
Auquiera abrir la puerte
Del alma al so glayir
A muertu,
A son fenetible
,A güesu royíu
Pel gadañón famientu...
Siempres les voces, siempres,
Tascaben-y por dientru,
Mordiendo xixa del celebru
Percorriendo les coraes
Como merucu fechu soníu
Afuracando-y ensin descansu.
Yeren voces, yeren semeyes
D´otros díes, nun siempre felices,
Pero díes d´él, díes al devalu
Ensin priesa p´alisar el priegu
Del vistíu de la vida,
Que yá comu taba, taba bien guapo...
Hai mester que viéreis
Esa carbayera abisía,
Con estru sonce de fueya seco,
Eses otres semeyes de pedreros
Azotaos d´agua y vientu,
Onde´l balandru de plásticu
Entá tien de flotar anguaño
Nos charcucos que debuxen
Les roques musguines,
Que nada nun saben de tiempu.
Endagora saben les llámpares
Que yá nun ties padre que les xinte,
Zapicando coles sos piernes tan llargues
Pente esnidiosos regodones,
Y elles, igual que yelmos antiguos,
D´antiguos samuráis o ballesteros,
Gocien del reposu llueu.
Y eses caleyes secretes
Que baxaben a praos pindios
Y de la sebe, a un pasu, el pedreru,
Entá sienten aliendu d´aquellos tiempos,
Y dacuando él, explorador
De cabera hora, solitariu sabuesu
Gulismiaba lo selvaxe
Nun infantil oldeú
Por saber si les caleyes toes
Xuncíense toes, por misteriu
Y caltriaben asina el xacíu
Ensembre del universu.
Fixo una vuelta´l mal,
Yá nun quixera facelo de nueo,
Quier atopar el so sitiu,
Y como pasa nes velees insegures,
Milenta torgues sin sentíu
Apaecen llueu, allargando
De continu llegar a bon puertu.
Primir voces que glayen
A los cuatro vientos
“Llibre” y a volar,
Nun pue ser bono,
Anque la voz camude en cantu
Ynun ruempa´l cristal fino,
La voz fecha estatua sonora,
Al esiliu monumentu,
Del sollutir regueru
Cande de salada llárima
Del qu´aprovez por tornar
Bien llueu.
Alzar quixo una casona
De roca fuerte y roxa
Y blasón arguyosu,
Enfrentándose al tiempu.
Esa yera ilusión y abellugu
Pa metese dientro,
Aguantando vientu y marea,
Esfarraplando l´escaezu,
Ye mester espardir les cenices
De vides maurecientes
Como puvisa yá non encesa
Que torna prietu´l suelu
Y llucha por esapaecer.
Esbilla
del.icio.us