Vivió nun país de voces

Entemecíes colo escuro.

 

Rastró un sartal de glayíos

 

Espantibles, y de fiyos foscos,

 

D´odiu enllenos.

 

Quiciás daquella tuviera drechu

 

A esmuzar pa contra palacios de xelu

 

Onde reinar con Brunhild

 

Arrodiaos pel llagu de fueu

  

Esplendente nun Norte irreal,

 

Llibres y puros toos los dos

 

 

Del indinu podrén invasor.

 

Pero los rellampos selvaxes

 

Y les altes muries de la fortaleza

 

Nun foron quien a dicir, “¡fuera!”

 

Al pasu seyellosu del tiempu,

 

Al mayáu enclín de les flores musties,

 

Al abandonu, al sele barganaz

 

Del tiempu, que Dios sabe ú va.

 

Esi Norte tan llonxanu

 

Métese-y más y más en biesques trupes,

 

Y dientru como ta, el llobu

 

Feroz de los cuentos y velees

 

De cuando neñu, acesma,

 

Y nun sabe´l bichu prietu

 

Lo que va comer, si cuerpos

 

O alcordances,

 

O quiciás el Ser mesmu

 

Cadeciendo como paez

 

De Sustancia, de brenga vital

 

P´arrecostinar cola nueva vida,

 

Si vida tala ye, si ye daqué

 

Más qu´un Purgatoriu real...

 

Y que l´Asturies daveres

 

Esistió namás qu´en cuentos,

 

Y la vida d´él cuentu fue,

 

Xintaú polos llobos de la mocedá,

 

Y de tantu tiempu preciosu

 

Perdíu sin la serenidá,

 

Anantes bien, él, estórdigu figu

 

Cayó de la figar

 

un día de setiembre,

 

pente fueyes grandones y l´aire

 

fríu d´una seronda bien distinta,

 

que llamaba a mundos secos,

 

mundos nuevos,

 

onde otros calores anochaben

 

sacantes los del llar abrazáu

 

por un dueñu sin drechos dalos.

 

 

 

 

Yá nun yera amu, solo vieyu amigu

 

De tierres qu´antaño dominaba

 

Con vista llarga y naguando paz.

 

Yá quería paz y horizontes,

 

Y eso que pa horizonte tuvo siempres

 

El más divinu de toos,

 

Horizonte de mar,

 

Onde los fumeros de los barcos

 

Y les proes puestes énte´l frente

 

De foles braves esplumoses

 

yeren toes un rispir sagráu

 

por otru Norte más al Norte,

 

habitáu quiciás poles reines

 vírxenes ente palacios cristalinos.

Esos setiembres aliquen

 

Entá na fueya seco,

 

D´ocalitos aplastao

 

Al pasu los coches pel asfaltu

 

Infanzón p´arriba, camín del llar,

 

Fueya que´l vientu nórdicu

 

Arreflundió con rabiura,

 

Dexando les sos mimoses

 

Col raigón asomando,

 

Y la teya en suelu.

 

 

La mar tan picada yera tamién

 

Setembrina güelga del tiempu

 

Sapozando coroques braniegues

 

De cielos llimpios y caparines inmortales,

 

Pues los sos llabios fríos

 

Dicíen-y qu´él yera llegáu

 

D´una castra avezada a los rigores

 

Del bastiazu feroz, de la homedancia

 

Bautismal de tierres verdes,

 

D´un verdor qu´a dalgunos manca.

 

Los díes acurtiábense, y yá llamaba´l

 

Calorín d´un llar encesu

 

Col pote ferviendo pa mañana,

 

Y el dir ceo pa la cama, atentu

 

Al rumiar llonxanu de la vaca,

 

Al lladrar,

 

Al miagar,

 

A la nueche que ye orquesta,

 

Al descansu celeste,

 

Sanu y honráu,

 

Al cielu estrelláu de nueches xélides

 

Y a la promesa d´un añu meyor...

 

Al Norte´l so Norte,

 

El Norte por nortiar,

 

Acolumbrar otres meyores siendes

 

Nes qu´a gustu esporpollar

 

Como gran carbayu milenariu

 

Que, tres l´hachu indinu

 

Y milenta guelpes criminales

 

Llucha entá por biltar,

 

Surdiendo fiyos y retueyos

 

  

Pente raigones tarazaos

 

Alitando enforma cola voz vieya

Del que nun supo más qu´aguantar.

 

Hai na mar un mensax

 

Que se repite ensin aparar,

 

Una conseña d´amor y guerra

 

Qu´aveza dicir, “nun me dexes”

 

Y nun dexar ye´l usu y la llei

 

Del mar que-y vio nacer,

 

El ruxerruxe de foles mui fuertes

 

Como cosacos qu´avancen nun frente

 

Escontra´l sable d´oru

 

Al gritu d´ataque,

 

Con cortexu d´aves sorrientes

 

Y mui canciadores,

 

Talo como dicen d´antiguos héroes,

 

Qu´arrequexen el dolor cola poesía,

 

L´aire fresco y llibre, el vinu,

 

Baños de mar, sol y vientu,

 

Y un cuerpu entregáu a la griesca

 

Premanente que ye vivir

 A un palmu de la muerte.