Caltenía una freba d´oru

 

Arimando al recuerdu

 

De los díes yá gastaos

 

D´orpín cayíu

 

Hora tres hora,

 

Perdayuri, al devalu.

 

Guardaba pa consigo,

 

Un estoyín secretu

 

De semeyes tamién gastaes

 

De manes cariciantes

 

De ciñu presu de pretéritos.

 

Nueche tres nueche

 

Per tola redolada

 

Xixilaba los cambeos

 

De llume nes lluciérnagues,

 

Por ver si dalguna apurría

 

Mensaxes del tiempu,

 

Anque´l tiempu yera polía

 

P´estrapayar contra la bombiella,

 

Y l´espaciu yera valeru

 

Llar d´esilios ensin xacíu,

 

Cárcele d´almes escaecíes

 

De tou delitu, de toa falta,

 

Pero d´almes preses, al cabu.

 

Espaciu d´almes de rexa ciarrada,

 

Piesllu ferruñosu pa tou canciu...

 

Sintía davezu apellidando

 

El so nome na trupa viesca,

 

Onde añeren seres sin cuerpu,

 

O con imaxe de bisarma,

 

Fría y tresparente,

 

D´alma a rastres,

 

Alma ximielga

 

Y siempre famienta

 

D´alcordances, de mares,

 

Toa ella un rispir,

 

Toa ella nada.

 

Y guardaba, guardaba:

 

Ñeros con albuertos,

 

Güesos de santu en dulda,

 

Dentame de víbora

 

Y canil de guaxa antigua.

 

Talmente yera´l rapaz

  

Aquelli de cuando entá gociaba

 

De suaños y veyures,

 

Suaños esos qu´arrecendíen a futuru.

 

Yera yá grande, por embargu,

 

Y metía na so faltriquera

 

Les llagarteses de plata

 

Que-y dicen Bruxes de Lluna,

 

De les qu´otorguen bona suerte

 

A los llocos d´atar qu´anden sueltos.

 

Denguna melecina había

 

Nel mundu que lu valiera

 

A curar el pesadiellu

 

Que seyellosu trayía

 

Al recostín, sele.

 

Cada mañana se torna un güei

 

Y por embargu´l güei camuda

 

N´otru hermanu aconcasáu.

 

Esi yera´l so vagamundiar,

 

Nun yera otro que dar rellumu

 

Al camín, cola so xeitosa figura

 

Gastada n´otres dómines meyores.

 

Hai un ñeru blancu xunta la mar,

 

Hai un prau, siempre mal cuidáu,

 

Siempres mui amáu, güei entá,

 

Hai una casina blanca col rostru reguilón,

 

Güeyando pal mediudía,

 

Pente escayos acesmando

 

Por ver si un día torna,

 

L´amu llocu ensin escritures dales.

 

Hai una “Escalera” tayada

 

Qu´un pariente llonxanu aperió,

 

Baxadera salvaxe al reinu los pexes

 

Au mexafontes y serenes inda son amos

 

De les agues tan cercanes al divinu llar

 

Que l´abandonu y les siendes

 

Foron sapozando más y más.

 

Endagora habrá convite

 

De criatures marines y aéries,

 

De les que saben glayar verdaes,

 

De les que camuden plumes y escames,

 

Pero nunca paroles y sólidos recuerdos.

 

L´home tenía de saber nun endolcase

 

En venaes y determinos valeros

 

Sinón güeyar muncho los cielos,

 

Los suelos, los güertos, los roxos calicores

 

Del fueu camburante del qu´un día foi

 

Cuandu neñu, yá namás beriar

 

Nel so blandiu trubiecu.

 

Verde nacimientu´l del asturianu,

 

Verde aquelli del que vos falo,

 

Verde pero serondiegu anantes de tiempu,

 

Y esborriáu pel blagu d´otros díes

 

Quiciás borrinosos abondo.

 

Altes muries, como Olimpos foscos

 

Abellugaben paraísos pequiñinos

 

De cases escolingaes y guapos arguyos

 

De quintanes que s´espurríen dica la mar.

 

Yá nun hai requexu pa él,

 

Perdíu pente´l caín del llanu,

 

D´esi que surde de la tierra seco,

 

Y xela l´alma, y fiede a fumu y a muertu.

 

Los rostros nun-y saluden

,

Son como calabres, como espectros

 

D´un mundu somorguiáu baxo tierra,

 

Fechu de podrén, prieto.

 

Cares que nun ríen,

 

Xeitu foscu, secu,

 

Que-y dicen al de la nublina,

 

Al solitariu del norte,

 

“Nun soi amigu, vete llonxe,

 

Ve a morrer a otru lláu,

 A la gueta del to cementeriu”. 

Adayures cuidó dir entoncies

 

Aldovinando que´l destín apruz

 

En cuantes ún se distrái,

 

Pero él surde tres del árbol,

 

Y díxo-y que taba yá a piques

 

De da-y palmiaes na espalda.

 

Atrás les fontes, d´agua fría,

 

La pureza mesma del prial

 

Onde inocentes beben los seres

 

Añaos pola Madre, atrás

 

Les vírxenes cumales, corones

 

De la ñeve primaveral, atrás

 

Los pedreros sacando pechu

 

Énte la fosca mar, alantre

 

Y atrás coles foles enviyando

 

Restos de naufraxos, y espluma

 

Asgaya pa bañar costes xabaces

 

Onde guetar alcordances

 

Y au sanar, atrás tantu mar,

 

Que ye como dicir vida, mundu, llar,

 

Atrás too lo que ye valir,

 

Que munchayá´l requexu verde

 

D´esti fornu,

 

D´esti ermu,

 

D´esti martiriar

 Quedóse bien atrás... 

El mantu margarites,

 

Flor de manzanilla, cenraya,

 Trébole y fueya seco de lloréu,

Entá sigue anochando,

 

Espera que t´espera.

 

Y él nun llega, yá non más.

 

Cada pétalu, cada rosa sin curiar

 

Apiegada a la muria, esperen sin parar.

 

Yá camudaron piel llagarteses amigues,

 

Yá arrenunciare´l merucu la fruta

 

Ver al so amu aportar.

 

Nel llimbu tarán los pumares cayíos

 

Pela sangrina bruesa,

 

La qu´aprovez por matar.

 

Esaniciu grande, fatal,

 

D´aquel que foi llar trupu,

 

Balse sagráu del descansu

 

Braniegu xunta la mar.

 

Con arguyu cayó´l pinu

 

Y milenta árboles más.

 

Con rabalbu mataron les bisarmes

 

Les que dende neñu él cuidó

 

Les que debíen tar, arrodiando

 

La casina, dando vueltes pela nueche,

 

Pues dicía una vieya lleenda,

 

De les que nunca se sabe si foron verdá,

 

Que haber hubo calabres sapozaos

 

Pente los muriecos, y prau abaxo

 

De cuando moros o quésiyo la xente

 

Cayeron baxu palaes de tierra.

 

Llar: más bien llar de la muerte y los pasaos,

 

En cuenta del vecín güei, duldosu

 

Instante, del que nun se sabe yá

 

Si güei foi daqué, dalgo veraz

 

Con brenga abondo p´alicar

 

Una vida testonera, toa ella rispir

 

D´una neñura cásique escaecida,

 

Que de feliz, ni un res,

 

Que de paradisu nada,

 

Que nada hai p´agarrar,

 

Ni pasáu, ni patria, ni realidá,

 

A la que cantar.

 

Él cancia con estos versos

  

Que son tamién agua

 

De la que s´aveza echar a la mar,

 

Apurriendo notes señardoses

 

A la so rede rota de pescar,

 

Rede afuracada au pexes de plata

 

S´esmucen, y nun se quieren endolcar

 

A estes ocioses remebrances

 

Faltes de tou xacíu, xixa, paz.

 

Quixo paz, y ella vieno n´antroxu

 Vistida namái que con perfume... 

La imaxe del so amáu vixu

 

Que con ciñu quixo agasayar

 

Lo meyor que d´él guardaba

 

Yá nun ye solombra siquiera yá.

 

Ye como un llastir llastimeru,

 

Ye como una cáscara frañida

 

Pela metada, basoria pa tirar,

 

Valera por dientro, sin brenga,

 

Ensin recuerdu malpenes,

 

Toa ella, nada.

 

La imaxe aveza ser semeya

 

Collor xibia, vieya estampa

 

De caleyes y baxaderes

 

A pedreros salvaxes, perdíos

 

Mananciales y fontes de xanes

 

Enllenes de paz y arume,

 

Coles mores a esporpollar,

 

Gordes como uves, duce manxar

 

De les más gordes abeyes rexies

 

Qu´aporten del otru lláu del mar

 

En compaña druides o princeses

 

Que por esos reinos avecen habitar,

 

Y camudaes en santos animales

 

Aporten a la Mariña ésta a convidar

 

Al llocu paseante que nun viaxe astral

 

Va tolos díes en forma solombra

 

A reza-y con sentimientu paganu

 

A los dioses de la viesca, del pedreru,

 

Del mar, del manancial, del vieyu llar

 

Onde surdieren los mios mayores

 

Con tola manífica realidá

 

De les criatures antigües, profundes,

 

Comu´l carbayu virxen de toa bruesa,

 

Comu la xana terrible, llibre del güeyu

 

Interesosu o porcaz, llibre

 

Criatura de tou pesu llivianu

 Menos del pesu sagráu de l´antigüedá. 

Pero ¿quién ye a ciarrar la puerte?

 

¿Quién puede dalgún día pesllar

 

Con fierru esti mundu de cuentu,

 

Pintáu de verde y suañu

 

Llueu d´algamar dellos tisbos

 

Dende neñu, como ser recién llegáu

 

Al mundu y al cabu abre güeyos d´estrena

 

Y a la duce Madre atopa cerque

 

Col séquitu poleyos dimpuestos

 Y en tou momentu cariciar? 

Yá xube´l caín

 

D´ellí abaxo, dende la mar,

 

Pon la camisa, qu´esta ñube a ras de suelu

 

Nun ye bona acabante de sudar,

 

Paez un anxélicu exércitu

 

Siempres prestu a trunfar,

 

A tapacer de sópetu les tierres

 

Verdes y d´homedancia llenes

 

Que con ciñu d´aceru hay que les segar.

 

Ehí veólu, espíritu, en sudorancia,

 

Peñando col metálicu estrumentu

 

El vieyu llar que los antiguos-y dieron.

 

Mala venta fixo, al colar llonxe,

 

Y los mesmos raigaños de so, curtiar.

 

Ehí tará tendíu, gulismión entovía

 

De l´arume del lloréu y la flor de manzanilla.

 

Namás-y queden pallabres,

 

Tan poca cosa ye ésta

 

Cola que poder faer garrapiellos invisibles

 

Colos que maxinar un Paradisu

 

De los que s´aprovecen dica la vieyera,

 

De los que nun sirven d´abellugu,

 

Ni tampocu guarnir una sencia fería

 

De milenta batalles, denguna ganada

 

Del too, toes llantaes pa nada.

 

Abellugos de recuerdu,

 

Viesques pal etenru tortoriu...

 

Ellí ta él, sin cuerpu presente,

 

Presidiendo´l so propiu funeral,

 

Como ye costume y ritual,

 

Nes honres de so, bien tristayes cada día,

 

Va afristar flores al pedreru,

 

Pa que caigan xunta la fola,

 

Pa que les trague la mar

 

Y con elles les serenes

 

Llevanten altares al llar

 

Perdíu na nueche los tiempos,

 

L´atapacer onde les vides vidables,

 

Marchen y nun tornen, esnidien

 

Pel mundu alantre

 

Y naide sabe daveres

 Onde diañu se van.