ODA CÉLTICA
Infinites son les siendes
qu´empobinen dica tí, patria,
bayurosos mares de felechos
que ximielguen los brazos solombriegos,
umbaxu´l mantu de los árboles sagraos
y upen oraciones a los vieyos dioses.
Infinites caleyes de mofu antiguu,
onde atroparon ambrosía aquellos druides,
fíos de la xente máxico qu´un día partió
en naves doraes a l´antigua Eire.
Asturies, reina de los mundos verdes,
apiegada a una llabana d´ermu
que t´aforfuga nuechi y día;
corazón de serena triste,
divina fada dadora de brenga,
alza la to voz nesti díi buxu de truena,
glaya fuerte, cola perfonda lluz
de los dioses del bosque.
Los tos pasos sigo siempres
y ca requexu yes tú,
un mundu distintu a la vuelta del camín.
Milenta rostros, un solu ser.
Esbilla
del.icio.us