Énte´l Cervigón
Al retirase cada fola la mar,
Talmente un xigante suelta milenta
Monedes grayantes
Y los cantos falen
Como espíritus de la espluma
Bendita; la que xorrez fresca
Al morrer énte la cara Tonante del Cervigón.
Ruxe, ruxe mar Cantábricu,
Naide como tú saca´l pechu
Desfogando brenga y aliendu.
Ruxe, truena fecha augua,
Diosa blanca y de mil grises,
Azules y verdes,
Mar Engüeltu en ñubes trupes asgaya
Que yo perdí un día…
Yo foi fola que ruempió:
Nun hebo torna
Con un puñáu de recuerdos
Puestos al recostín
Ente xigos puestos de contra
Y ensin botes pal camín,
Llanzeme a la gueta un mundu
Naguando por un provenir
Y con febre y páxaros rebullendo
Dientro, dientro.
Esbilla
del.icio.us
De verdá son tuyes les poesíes? Son perbones. Yá reconmendeles nel mín blogue.
Frankzalekz | 23-09-2008 - 20:06:59 GMT 1 #
Gracies. Yes rusu o rusa? Emigráu o emigrada? Munches gracies
L´autor | 23-09-2008 - 21:39:34 GMT 1 #
Lo mesmo te digo, dedícote una entrada nel mio blogue. A siguir asina.
L\'embaxador | 25-09-2008 - 00:55:10 GMT 1 #
Gracies por ponderame. Cuido qu´Asturies ta demasiado cerca de Castiella, y yá sabéis que l´influxu de Don Quixote fo pergrande: mató´l romanticismu anantes que surdiera. Pero Asturies tien un formientu celta y xermánicu, ye dicir, románticu, el so propiu paisaxe y la mitoloxía llariegues lo amuesen. Pero los Astures tan escaeciendo lo que siempre foron, quieren ser castellanos munchos d´ellos, y los hai de mentalidá spañola asgaya, anque escriban perbién n´asturianu. Gracies, otra vuelta.
L´autor | 25-09-2008 - 09:00:08 GMT 1 #
Un blogue bien prestosu. Norabona. Y les imaxes qu'acompanguen a les poesíes nun puen tar meyor escoyíes. ¿D'au les saques? Habíes pone-yos la procedencia.
Prestaba que dalgún grupu celta o asemeyáu musicara estes lletres. ¿Nun conoces esa tendencia que se noma "folk góticu"? Pémeque n'Asturies nun hai grupu dalu que la represente, pero amestando les to poesíes diba quedar una cosas muncho guapa (por suañar que nun quede).
Un saludu.
José Carlos Loredo | 01-10-2008 - 16:40:50 GMT 1 #
Gracies José Carlos. Nun conozo esa tendencia. Hai dalgún grupu que me puedas dicir? La mestura de folk y goticismu nun podía ser más guapa... Lliterariamente tamién se podría iguar una cosa asina. Gracies por lleeme.
L´autor | 02-10-2008 - 07:11:05 GMT 1 #
Sí, ho: Dead Can Dance, Trobar de Morte, Ainara Legardon... Son los que me vienen a la tiesta asina d'esmenu, pero hai dellos más (nel Google atópeslos fácil). Pel momentu namás tengo escuchao sele a Dead Can Dance, pero toi algamando coses d'otros. Amiesten soníos d'aire medieval, dalgunes guitarres del rock góticu, violines folk... Nun sé cómo dicite: delles veces, más que melodíes, faen atmósferes.
Otru que nun pertenez a esta tendencia pero que t'encamiento ye Matt Elliot, sobre too'l primer discu (anque los tres de so son bonos), onde hai un piano distorsionáu que paez tocáu por muertos...
José Carlos Loredo | 03-10-2008 - 15:39:55 GMT 1 #