Nun país tan olvidadizu,

 

Yá nun recuerdo si nací yo.

 

Sé que´l mio berciu yera verde

 

Y los cucos de yerba doraos de xunetu

 

Valdríen pa facer peselbes amorosos,

 

Onde nacieran dioses, fades, fíos del cielu...

 

Nuna nación siempre tienra au´l cielu ta en suelu

 

Llapando´l cielu la rica humedancia

 

L´agua bendita de la herba,

 

Meciéndose sonce pa con ella.

 

Nun paecería abegoso ser santu,

 

Y vivir como talu.

 

Aquelli, país de mio recuerdu,

 

NUn yera llar pa les fosques falcatrúes.

 

Nesta estepa enfoscada

 

Y camburante siempre dicen: “Yo´l primeru”,

 

Cosa que pa min nun val, mamina mía.

 

Que tu me deprendisti a vivir guardáu,

 

El caberu de toos,

 Deprendístime

A dilíme pente nublines eternes

Ente silencios

 

Deprendístime

 

A rumiar sonce,

 

A tomar por únicu y verdaderu techu

 

La cumal del árbol vieyu y candial

 

A facer como templu la solombra los carbayos

 

Y la llume del sol espeyada nos montes

 

Cuando risca l´alba o tapez el mundu...

 

Saber d´eso,

 Anque nun sepas más nada del mundu.

 

Ye la bóveda d´eses foles, quésiyo cuántes,

A enviyones meciéndome les idees,

Ye´l recuerdu de sintir la mar

Esfreciendo la frebe de tantu marguriu...

Ye too eso polo que-y digo a la mar“

Tantu te debo, qu´añaste la mio vida...”.

Nun pescudo un Cielu de premiu ensin mar,

Y sin la mar fosca del Cantábricu míu

Nun quixera esi Cielu monótono

De gases d´algodón, ente ñubes sonces

Y azul pintaú por neños, que non por un dios.

Pa min nun hai más Cielu

que´l gris

Cermeñu y llastimeru,

ente fuertes vientos,

Del que gueten atambase los navíos,

los marineros,

Un cielu que-y dé como premiu a los bonos

Poder ver la mar embaxu d´él,

ver siempre la mar bien llueu,

A los que, nun sé por qué pecáu,

nin por qué mal fixeron,

Hubieron de colar pa tierra adientru.T

ierra adientru toi, y nun sé si merezo,

Tar sin vete mar de mios mieos, 

mar de mio berciu,

Colé ensin decite adiós, colé cégaru llueu,

Camudé´l verde, azul, la espluma de lleche, el gaviluetu,

Por un mar de tierra, lisa ensin foles, tierra too muerto.

Dame mar, fortuna, providencia, promesa, vientu:

Sinón sé de dios al que-y rezar, a tí mesma mar te lo ruego,

Dame´l salitre, el verdor mariñanu, el nordés, la vida

Toa que relluma con brenga, imperiu de la guapura,

Esa qu´añera nel alma d´un poeta vagu sin aliendu pa espresar.

Mar norteñu, davezu arispiu, yes poema en danza salvax

Fechu ruxíu, sin mester dengún de parzamicos ociosos,

Sabes ser Olimpo imposible d´escaecer,

Tú contaxes esi etenru ziszás de los humores

Solombreros de quien yá sabe

Qu´una breda te perdió...

 

Zapicar, nun ye lo peor

Nin tampoco mancase nes rodíes,

 

Lo peor surde cuando nun hai suelu

 

Al que cayer, y por embargu das los ayes

 

Nun pínfanu sin fondu, nun mundu ensin tiez

  

Nun sal la vida de paséu,

 

Nun hai cai baxo´l techu

 

D´estrelles fríes tremando de fríu

 Y coches entainando por dexate siempre atrás. 

Treslládote paroles que nun son de mío:

 

Soi zombi, soi boca de marioneta

 

Ximelgada dende dientro pol demon

 

Más estrañu del mundu,

 

Eso qu´avecen nomar Yo.

 

  

Pela cuesta sube´l carru

 

Fenetible con llorones incluyíes:

 

Dicen que güei nun hai muertu

 

Pero arreciende la tierra a calabre.

 

Cuando muerre dalquién siempre

 

Ye´l mesmu´l que se va.

 

Muerren tamién los qu´aguarden.

 

Muerren siempre.

 

  

Llendando les margarites,

 

La cenraya, el felechu,

 

Viendo formigues esploradores

 

Del práu al rodiu la mio casa,

 

Diba yo camín de ser vexetal

 

Parte d´un paisaxe prístinu:

 

Yá mercóse too,

 

Y una parte en camín

 Perdió suelu, tocó fondu. 

 

Un día van tornar

 

Les abeyes n´ensame sordu

 

Col zum-zum alloriando ceo

 

Al que se-y ponga de por medio

 

Y les altes muries d´aceru odiosu

 

Van cayer col estrópitu fieru

 

Del que nunca nun ñació

 

O tuvo nacencia muerto.

  

En ficies d´un día distintu

 

Dexó atrás la puerta

 

Y d´un golpe abrió

 

Ventanos otros al mundu

 

De tantu anchor

 

Y rectu horizonte.

 

La puerta entá cimbla

 

D´esi estrópitu secu.

 

Nun hebo nada,

 

Sólo marchó.

  

Tráime un recuerdu

 

Si a esi mar viaxes llueu,

 

Quiciás una perla del so fondu

 

Seique un bígaru d´oru

 

Pémeque una gota divina

 

Que sepa al sal y a vientu,

 

Traime'l mar, tou ello,

 

Quiero tenelo a la mio vera,

 

Daría lo que fuera por tenelu

 

Dientro, dientro, dientro.

  

Rolando pel mundu

 

Nun sabe l´espíritu

 

Que les nueches son d´ún solu

 

Y los suaños tornen a fala-y

 De la patria suya. 

Ruempe la fola davezu

 

Con rabia pero con ciñu:

 

Nun odia la roca,

 

La fola vuelve llueu.

 

Nun falla nunca la fola.

 

Cuando ruempe diz:

 

“Agora vuelvo”.

  

Nun sé si paga la pena

 

Llanzar al mundu globos.

 

Quier el neñu que xuban

 

Pencima los cielos,

  

Pero l´aire torna a l´aire

 

Y hasta los cielos acaben

 

Por morrer nun prietu techu

 

Onde los anxelinos va tiempu

 

Cayeron y nun volvieron.

 

Guarda los globos, neñu,

 Pa meyor momentu.  

 

Nun me paro a sollutir

 

Por toos esos troncos valtiaos.

 

Yo los llantara, sí,

 

De pensamientu, pallabra,

 

Obra y omisión, yo los llantara.

 

Quiero más nun mirar pa la foguera

 

Y les povises que dexó tanta vida,

 

En cuantes dexa de ser vida,

 

Y pasa a ser recuerdu, bisarma, nada.

 

Quiciás yera otru´l que los mercara con ciñu,

 

Que non yo, quiciás,

 

O nel monte  fuere otru

 

El que guetara retueyos pal mio suelu

 

Y solos, sin más curiáu,

 

medraren como fiyos xigantes,

 

heriedes d´un alma arrogante,

 

Como quería ser la mía.

 

Pero aportó la bruesa,

 

Pero por Dios esa nun foi la mía.

 

L´aceru mortal tuvo otru amu.

 

Agora

 

Morrió la mio alma vexetal,

 

Toi ensin cazumbre

 Yá d´eso yá nun hai dubia.

 

Trema l´animal,

 

fechu un caricós

 

Como aquelli qu´esplande

 

na nueche más escur

Y nun hai orpín,

 

nin humedancia dala pa dilir

 

Un corazón anochando,

 

solu baxo techu ensin estrelles...

 

Trema esa llume pequeñina,

 

entá encesa

 

Pese al peligru que-y representa

 

El debuir de fieres alrodiu,

 

seres prietos

 

De los que nun perdonen

 

Dientro l´apavoriante vida nocherniega.

 

Pero los güeyos valientes aguanten,

 

Saben qu´esti mundu nun yera´l de so

 

Y que les coses asoceden selemente,

 

Y qué facer sinón callar,

 

Como melecina pal alma revuelta

 

A piques d´españar de mieu

 Y cola fatiga de mirar p´atrás.

 

El mestu barganaz

 

De fueya seco,

 

Verdiasca podre,

 

Güesos escanucaos

 

Y calabres de milenta primaveres

 

A piques tresformase en seronda vieyo,

 

Esi regatu, digo, esi agua ensin llastir,

 

La qu´arreciende de lloñe,

 

Y sapoza nun mar de verdes borbolles artificiales,

 

Yá nun baxa de la mio montascosa patria:

 

Ye´l trupu exércitu infernal d´un Progresu pa Muertos.

 

¡Que sía bébora pal que mos la trai!

 Yo nun cambio Asturies pol velenu. 

 

Suavino vien una imaxe,

 

Y esguila pente milenta:

 

Siempre ye igual, imax d´oles,

 

Y baturiciu alloriante de gaviotes.

 

Tamién aprucen fueyes seques,

 

Ente árboles fartos d´humedancia

 

Y un ríu –probe ríu Piles- envolviendo

 

Ramasques d´ocalitu, vagarientes...

 

Esguilen les semeyes d´otros díes,

 

N´alborencia de xornaes bien grises,

 

Y anque digan: grises yeren los cielos aquellos,

 

Mayor borrina añera nes vidayes suañando

 

Cuando nun saben de mañana, y güei duermen,

 

Entregándose dolces ya inocentes,

 

A esa Villa perdida, Xixón sele,

 

El qu´envuelve´l so gris con prau y mar,

 

Col monte y el cielu,

 El Xixón qu´envuelve.

 

Nun somos una unidá

 

Pa con nós mesmos

 

Nunca.

 

Tol cuerpu camudó

 

Y nada nun queda de cuando yera neñu.

 

Les idees antigües colaron como fumu medranosu

 

Del qu´esparde´l vientu

 

Y aventa´l lloréu quemando

 

Como tormentes vagarientes

 

Que pasen de llargo.

 

Nun somos unu nin dos,

 

Nin nada que camentar al vecín.

 

Nun quedamos afitaos en suelu granible

 

Nin sabemos p´au queda´l Norte llonxanu.

 

Toles coses son como esi torbolín:

 

Ensin xaciu xirando pol placer de barrer el suelu

 

Tres les puestes llargues, col sol vieyo

 

Quedamos nun poyu sentaos

 

Esperando´l turnu: dicir alón

 

Y depués la cena.

 

Nunca se sabe si la última cena.

 

Nun soi´l que fui.

 Nada fue que güei sía.

 

 

Nun pasiellu de güesos espardíos

 

Y voces qu´afuxen de les sos gargantes

 

Los muertos van y vienen pa contra min

 

Y nun son quien a salir de les milenta eternidaes

 

Que-yos queden de vagar perende.

 

Y yo vago pero nun quiero

 

Ser como ellos

 

Nin tar nesta ténebre mansión.

 

Pero un día sentí a mio voz dicir:

 

Nun toi muertu,

 

Nun toi muertu

 

Nun toi muertu.

 

Pero nun yera verdá.

 

Yera unu d´ellos.

 

Namás qu´unu d´ellos.

 Una voz ensin tiez.

 

 

Nun enxugues l´alma

 

Colos recuerdos de díes felices

 

Nin tampoco caltengas lloca coroca

 

De lo qu´entavía nun te llegó

 

Porque lo non ñacío ye d´una sustancia sutil,

 

La sustancia de lo inesistente

 

Que nun llega al Ser nin sabe lo que ye

 

Fasta qu´un llocu imaxina y pon el xaciu al vies

 

Como´l carrusel de la vida,

 

Como´l neñu fatu que da vueltes nun caballu

 

Na Feria del Mundu ensin saber cómo nin por qué.

 

Nun xuegues coles caricies del alma

 

Que nada saben de lo mísere qu´amuesa ser too,

 

Lo qu´esiste y lo que non, lo que quier

 

Un día sí y l´otru tamién,

 

Llorando xunta los charcos

 

Pa nun emporcar más de la cuenta.

 

Vete faciéndote a la idea

 

De que too ello nun val muncho más

 

Qu´una tarde llarga de lluvia:

 

Lo d´escribir versos que nun rimen

 

O lo de dir a la noria de los recuerdos

 

Xiblando les mesmes canciones de cuando la vida

 

Un día te trató bien.

 

Xira y xira, y déxate llevar,

 

Que´l vientu too lleva,

 

Que la lluvia too ye a borrar,

 

Golpes y güelgues, rises y llancios,

 

Fasta´l clangoriu del que muerre

 

Tamién muerre,

 

Y muerde´l Tiempu,

 

Esi que pasa y el que se detién:

 

Too ye tiempu, y llancia a fartu,

 

Y Pocu más.