SERONDA ESCURA: Poemes y rellatos siniestros y románticos
Vamos entrar nuna nuea dómina de romanticismu nel País Ástur: has d´acompañame.

Al retirase cada fola la mar, 

Talmente un xigante suelta milenta 

Monedes grayantes 

Y los cantos falen 

Como espíritus de la espluma 

Bendita; la que xorrez fresca 

Al morrer énte la cara Tonante del Cervigón. 

Ruxe, ruxe mar Cantábricu, 

Naide como tú saca´l pechu 

Desfogando brenga y aliendu. 

Ruxe, truena fecha augua, 

Diosa blanca y de mil grises, 

Azules y verdes,

Mar Engüeltu en ñubes trupes asgaya 

Que yo perdí un día… 

Yo foi fola que ruempió: 

Nun hebo torna 

Con un puñáu de recuerdos 

Puestos al recostín 

Ente xigos puestos de contra 

Y ensin botes pal camín, 

Llanzeme a la gueta un mundu 

Naguando por un provenir 

Y con febre y páxaros rebullendo 

Dientro, dientro.

Neses cumales compartiría yo 

Pasu firme y veloz curiando d´una peña mofosa 

Con llume cenciella y buena 

Afayándome, como paga la pena 

Namoriando les flores y los xilgueros, 

Percorriendo toos y caún de los senderos, 

Esfrutando de la brisa, 

Y facer de les penes puvisa, 

Y del vieyu caborniu a retueyar, 

Llantar nueva vida, biltu y sangre. 

Mentes fui iguando Los restos del naufraxu 

La mano marina tiróme per baxu 

Y al fondu perfondu

 Quíxome fundir 

Y al baxar al bosque d´algues 

Y al compartir pena colos pexes 

La voz llonxana de serena ñoble 

Falaba del que fui. 

Esi que fui yá nun esiste, 

Malapenes resiste 

Un recuerdu y un amorir.

 Hebo un torbolín xabaz

Que les febres separtó

Y el puntu d´arrinque fo

Talo que nunca más lu vio.

Quixo chase p´atrás,Cuandu tardi yera yá,

Y mentantu perdía la sombra,

La sienda, la vida y más,

Busca que te busca,

A la gueta d´un pista

U dexar atrás la sofrencia,

Guiándose cola querencia,

Enferma de señaldá,

Y esa febrina d´oru nun taba,

Namás que-y aportaben

Unes voces del más allá,

Un soníu llonxanu y quedu

Al que selemente veneraba.

Xuró que la vida sedría entós

Esi eternu buscar,

Esi monumentu al tiempu

Que´l vientu xabaz

Llevó-y cuandu rapaz

.Y crió mares metanes

Imposibles de cruciar,

Ermos de cardos secos

Y puvisa pa pisar.

Fo poeta porque tuvo feríu

De muerte ya tristura

Y tuvo por andadura

Caminos de clavos,

Ortigues y espineres. 

Son les agües cristalines
Tesoru y sábana llimpia
Onde guetar la sorrisa
Perdía pente la brisa
Cayía nel camín
De la vida acelerona
Qu´una Parca mala esfrona
Y texe sin ciñu´l destín.

Son les augües tresparentes
Que cuerren per corrientes
Gocioses y pures, ríos astures.
Son febres d´una diosa
Que namoriándome preciosa
Amoríandome verdura,
Y degolviendo la tristura
Ya col alma a piques de francir,
Son elles…
Pensarán que ye tar llocu
Ufrir la to bondá con tan pocu
Gastar pallabres envede besos
Pues nun hai versu que compita
Cola vida qu´a vivir convida
Con pasu allegre y cantarín.
Yá nun canto, solo llamento,
Yá nun falo, tan solo siento.

Pasaba la vida entera
A la gueta del puntu d´arrinque
Atopando día y nueche
Un llugar au se perdió,
Un puntu perdíu nel espaciu
Y un intre escaecíu nel tiempu.
Ye mui feble la realidá del recuerdu
Y por embargu ye real
Too aquello qu´añera nun perdíu pasáu
Que suaña ser güei:
Un güei que yá nun ta.
Nun ta, pero ye, y cuerre pela mente
Formando torbolinos rinchadores.
Pasaba la vida entera
Faciendo un castiellu nel Saber
Al que les marees braves
Tán arreches y prestes a desfaer.
El castiellu foi humanu,
El nome yera de persona
Y la playa valera fo,
Yá nada yera.
Pero él recuerda, eso sí, recuerda.

Nes borbolles qu´hai nes fontes,
Nos remolinos que ve nel reguerín,
Nos charcos continxentes del bastiazu pasaxeru
Nes coses que nun signifiquen nada,
Que nada son y a denyure dirán
Tien de pone-y un poeta nome y sustancia,
Pero non por ser poeta,
Sinón por ser antes tristu pelerín
D´un asurdu camín
U se pierde a cada pasu
Y onde les ñeves esborronen
Les güelgues y la casa.
Nun caneyamos, en realidá,
Pero ponémos-y nome a los finxos
Mentestanto.
Eso ye vivir.

Has de fixate no que te robaron,
Fasta la pallabra dolce y pura
Que biltaba de los dientes
Foi metida nun estoyu d´alcanfor
Y la llingua noble, antigua
Y nidia, la voz del tiempu meyor,
Del paisaxe y la tierra perfonda,
Somorguióse nun llargu sopor.
Hai asesinos de seres de carne.
Pero tamién añeren los que maten l´alma.

La carta faló de dos balandros
Cruciándose n´alta mar,
Dibuxando esteles nel augua
Pa nunca más llograr xuntar
Dibuxos tresparentes y guapos,
Pero les esteles siguieron mozcando
Pallabres y sintires.
Pencima, viaxen los balandros
Pembaxo, los pexes pueblen la mar.