SERONDA ESCURA: Poemes y rellatos siniestros y románticos
Vamos entrar nuna nuea dómina de romanticismu nel País Ástur: has d´acompañame.

El Xanu

Cuando falen de mitos n´Asturies siempre s´alcuérden de les xanes, magar nun fai ún que tenga unes pallabres pal xanu. Y ye una hestoria mui guapa esta que fala del xanu, que merez ponese al llau d´otros seres mitolóxicos del país. Paezme que los astures anden mal de la memoria, fálta-yos el riego o dalgo d´eso, porque yera´l xanu perconocíu en toles partes, y esti que vos fala violu una nueche, camín de la Llamarga, mui cerquina de Casa Gelu. Venía yo enfiláu, pero ensin pasame de rosca, como tu ya m'entiendes. Canté y bebí sidra... ¿quésiyo cuantu? Fízoseme la nueche escura, como focicu de llobu. El camín de la Llamarga fai más curtio la torna pa casa, y asina nun se tien mieu a los coches, qu´anden como llocos pela carretera de Granderroble. La Llamarga yera un sitiu de munchos mieos antiguamente, nos tiempos de los míos güelos. Dicíen que podíen vese llumes rares enriba deles agües y embaxo les grandes copes de los carbayones qu´enantes taben ellí plantaos.  D´eso foi va munchos sieglos, y cuidaron los mios güelos la hestoria que-yos contare´l señor cura de´entós, un curín como yeren los cures enantes, xente vieyo que metíen a tolos aldeanos la medrana falando-yos del demoniu, d´ánimes penando, el diañu burllón... y del xanu. Decíen entós que toles xanes del país (y, a lo meyor, fai dalguna en ca fonte, en ca ponte, en cualesquier regatu o charcu d´agua) teníen un solu mozu de la so raza. Y, cosa perlóxica, el mozu que-yos daba gayola a tantu espíritu muyeril, ¿cómo diba llamase?. Pues ya taba, “el sanu”. Yera´l xanu dalgún fíu de Satanás, o daqué. Yera feu como´l so padre, renegríu y de güeyos saltones. Pero d´estes menudencies nun fadríen casu les xanes, que sabe tol mundu que yeren muyeres antoxadices, y lu mesmu namorábense d´un vieyu, potrosu y calvu, que d´un rapazu abobáu y ensin desatetar malapenes.

 Metíme, entós, pente les zarces y maleza del camín pa dir a salir pa contra la Llamarga una nueche de veranu, tou contentu, tou cantarín. Al otru llau d´esi pantanu (que non esiste agora) taba la caleya que, metanes dos o trés xalés, morría xunto a la mío casa. Paecía que diba a trompicar colos muebles, gatos y les madreñes que, a modu de trampes, poníen los mios pás p´avisalos de la mio tardancia, y yo revolviera la idega d´esguilar p´al horru y dormir ellí mesmo, ensin atravesar la corrada, fasta que´l gallu m´avisara. Y asina, en pensando dexar en paz al mio pá, baldáu como taba'l probe de tantu trabayar, atopéme col Xanu. - ¿Quién c... yes?- Díxi-y, tou axorizau, con unes tembladeres que paecíen el Baile San Bito.- ¿Quién c.. voi ser? El Xanu´l llugar. Y paecíome qu´esti xanu yera dalgo cabrón. Entendéime: les pates (na más que dos, magar dalgunos dicíen qu´arrastraba tres) yeren peludes, como de cabritu. Nun tenía pies, non. Yeren pezuñes prietes, mui afilaes, como focetes d´acebache. Los güeyos rellumaben talmente como los de los gatos a la llume los focos d´un coche.  Víenoseme al caletre´l pensamientu de qué vida más bona la d´un xanu, magar feu, ente tantes muyeres xanes. Nun yera d´estrañar qu´elles se namoren tamién d´homes mortales, meyor que d´esti chivu, paezme que cornudu, que-y dicen el xanu. El casu yera que nun me daba tantu mieu él mesmu como lo que-y viere facer. En viniendo dica yo taba plantáu, arimóse sobre manera al mio costal, y entornando los güeyos, poniéndolos al vies, díxome nun sé cuántes coses que, pa les míes entendederes, nun llevaben per bon camín. Corrí ensin aparar, y faciendo tol ruíu del mundu, metíme na mío cama tres de zapicar con toles trastes.  Mio padre fízone trabayar entós el doble qu´enanates, y agora ta buscándome moza nel pueblu, por si acasu.

Cola lluz encesa, taramiellando, nun soi a pescanciar lo qu´ellí rebuye. Tien de ser un ser vivu, d´eso nun cabe dubia. Non. Quiciás deba ser un productu pasaxeru del celebru de mío. Nun sé. Inda nun sé qué faigo equí, atrapáu ente fierros y montoneres de piedra y cementu. Enxamás viniera al puertu, y pésame nel ánima facer una cosa tala. Yo soi una presona de vida sele y nornal. Les cuatro cais del centru yeren pa min el reinu de los cielos. La oficina seguros, y la mio cafetería preferida, El Capri, yeren los míos hábitats que por ñatura sabíen de los mios pasos.  Pero aprtóme la nota aquella: “Toi equí, el to Misteriu. Has saber que nel muelle Cubrición anocharé la to llegada”. Yo sabía lo que yera eso del “Misteriu”. Dende guah.e, yo cadecía una incómoda velea onde se m´aprucía una bisarma roxa, cuasi fosforescente, pero ensin contornu nidiu. Nunca nun supe interpretar esa imaxe. Nos caberos tiempos, metiéndome n´interné en ratos llibres pescudé dellos sentidos de la bisarma roxa, casi dilída. Un psicólogu suizu, o de perende, retrucó una breda, va un tiempu. Sigún dicía eso yera una conseña del mio inconsciente que yo debía obedecer. Dalquién tendría qu´amosame daqué d´especial relevancia. Bono. Yo dexélo tar. Trescurrieron díes, y más díes. L´escaezu siguió a eses velees y a tantes consultes na rede. La mio rutina, y los suaños de costume foron faciendo sedimentu, sele, rutinariu. La mio mente yera yá un asuntu cásique xeolóxicu. Un pasar que nun pasaba nada. Y aportó la nota. Dexárenla nel buzón del portal. Ensin sellu, ensin señes. Yera raro por cuenta de que´l portal de mio xixilábalu Cosme, l´eficiente porteru. Hubiere sido más cenciello depositala na oficina a cualisquier hora y día. La lletra, a máquina, de les antigües. Namái que se me decía l´intre de la cita. Taba intrigáu. Pensé nel psicólogu extranxeru. Nun podía ser. ¿Quién diba a tomar un avión pa veme a ciegues, pa dicime... qué? Nuna venada, darréu de haber dicho pa min, “non, ye de llocos acudir solu a un muelle destartaláu”, nuna venada –digo- a la fin fui. El taxi dexóme con urxencia. Pagué y empobiné metanes l´esfrecer de la nueche, metíu n´augua y col gabán pesando´l doble pola xabaz homedancia. Un camión vació quésiyo cuántos charcos de la llamuerga que, anguaño, nomaben El Musel. Aporté, depués de muchu caniar, al muelle Cubrición. Un cartelu medio esbarrumbáu dicía “perellí” con una mano dibuxada y un déu índiz, como si tamién hubiere yo aportao a otra dómina, una vieya edá de pantasmes que nunca nun perdieren los sos ridículos vezos de siempre. Sintíase la mar ruxar, comu´l monstruu que dende neñu m´amedrenara. Y tamién llegaba´l ruiu de maquinones llonxanes que naide sabría identificar, pero que taben ellí, faciendo testimoniu d´una presencia humana d´abegosa realidá. Quería pensar que los ruidos yeren familiares, los de costume, na mio ciudá nataliega, a la fin, pero tan iñorada por mín. Sintíalo... un ruxerruxe. Nun sé dicir si yera daqué asemeyao al ruiu amplificáu d´un insectu ente viscosu y metálicu. Sí. Un ruiu que daba noxu. Y aportaben tafaraes intenses, como si foren calabres en pudrición. Ellí víense los contenedores. Una solombra pasó d´un llau a otru, comu a escondidielles. Y llueu... bien ceo sintí esos pasos aselaos, furtivos. Pero pasos que sonaben namái enfrente, dende los enormes caxones metálicos. A espalda mía, alrodiu. En toes les partes, los pasos. Quixe grayar. Nunca na vida tuviere tantes ganes de glayar. Pero entós les fuercies aflaquecieron. Tolos pensamientos baillaben nel celebru, n´apretáu baturiciu ifernal. Esprecetéme milenta bredes, milenta dixera pa min que yá taba condergáu: querer conocer el Misteriu nun podía ser cosa bona, sinón un gafientu crime contra la vida.  Y a la fin, asomó la tiesta. Un redol prietu, d´enorme anchor, colos caniles retorcigañaos y una filera tentáculos, cuasi llátigos, que facíen xiblar al vientu, y que tarazaben hasta´l fierru. Foi un instante, malapenes. Abondo pa sintir ganes de nun conocer nacencia. Ún d´esos momentos d´apavoriu que pueden cola moral del más fuerte, y camúdenlu nun probe llocu pa siempres.