Nunca finamos como queremos.

 

Naguando pases, pente foles fosques,

 

Un vieyu y sólidu torrexón alzáu

 

Énte la mar y la cordalera,

 

Una muria grande y membruda

 

Que caltenga xoyes n´esta vida balera,

 

Pasaxera.

 

Una pumarada, una siella

 

Onde sentase al regazu de la figar,

 

na siesta,

 

Col llibru amáu en cuellu

 

Y un troníu llonxanu,

 

D´una nube, que si ha venir, que venga.

 

Y naguar tamién...

 

¡Pero esi suañu yá pasó de llargo!

 

Al emigrante nun-y entra too na maleta.

 

La vida fuercia a soltar llastre

 Y facer de lo fecho, cuenta.

  

Esmena, estrella vagarienta

 

Y ufierta la llume sonce al pelerín

 

Qu´esnala pente milenta mundos ,

 

Encesos globos

 

Y torguen a los suaños midir

 

El redol coronáu de tolos universos.

 

Vete llueu, antaina que nun llegues

 

Al llar perdíu, suañado siempres,

 

Metíu na viesca trupa,

 

Cuasi inesistente,

 

Como los tesoros del alma,

 

Los más candiales

 

Y cariciaos con ciñu.

 

Habéis dir, y perdevos darréu,

 

Sintiendo´l ruíu del sonce biltar

 

De los exércitos florales arranando paz.

 

Paz, dáimela, mio querida paz,

 

D´ella mi alma ta señardosa güei,

 

De tantes caleyes vistía que yá nun ye

 

Sinón povisa que llevanta´l calcañu

 

Pelerín, que nagua los cielos.

 Ellí taré, cielos, esplandiendo. 

Ente´l caín, unes llárimes:

 

 

Nun gociarás el so rostru.

 

Bórrase sonce y sólo´l vientu

 

Trai una música llonga, un toque

 

Como´l de les notes febles del fondu marín.

 

Fondu marín penriba l´augua:

 

Eso ye´l cantil del to anochar,

 

Muru de roca y verdín mugorientu

 

Azotáu pol ruíu bravu

 

Más bien que poles breves foles:

 

Esi ye´l paleisu que´l recuerdu-y traxo,

 

Una espera pal acesmo de gaviluetos cégaros,

 

 

Un glayar contra la mar, que nun ye glayar,

 

Pos la mar tola vida de Dios foi sorda

 

 

Y el que marcha, como muertu ta...

 

Muertu ta.

  

Nun fuisti tu,

 

 Corada fecha de piedra y mar

 

La qu´afalares a los tos fíos a colar

 

llonxe pa contra llonxanes cárceles.

 

En ti hai tierra abondo pal que-y sepa dar ciñu.

 

Ye namás porque te remanen otros,

 

Que de los tos misterios nada nun saben,

 

Ye porque t´espreceten con rensía

 

 Y de ti nagüen por facer un ermu,

 

Ye porque tas de criada,

 

Cenicienta

 

Y camudada en nada,

 

Ye porque arramplaron de ti la sudorancia,

 

El carbón,

l´arguyu,

 

Porque tantos fiyos fixeren l´amargu petate

 

Del viaxe de los probes sin torna

 

Y de tantu llarimar tarán los campos vivos

 

Enllenos d´humedancia

 

Pos anque prohibieren l´orbayu de mio infancia,

 

Les llárimes soles, como perles

 

Teníen de ser riegu abondo,

 pa españar de verdín los corazones.

 

 

¿Nunca nun vieras al cielu rincir

 

d´encesos colores al atoldu la mañana,

 

metía n´augua de viva plata y clamando lluz

 

perriba del arcu celeste, mansión d´humedancia?

  

¿Y nun sabes de la truena´l rinchar

 

con esi estrópitu sangrín, de rabia caltenida

 

dun milenta sieglos, tiempu de calma y calor?

  

Asina tornara esti fiyu tuyu a llantar allegre

 

Por una breda´l so infiestu árbole d´arguyu,

 

Acesmando un futuru bonu, ensin zarapicos

 

Pente caúna de les munches herbes, 

 Xoyes verdes que me vieren ñacer.

El carís avisíu del agua platiada

Esmuza pente les manes d´un,

 

Que nun hai fada que gociar nun seya

 

Quien a morrer embeláu.

 

A carrenderes surde´l torbolín

 

De bisarmes braves, y apelliden malapenes

 

El to nome – un sonoru nome de calabre.

 

Baxasti a un infiernu escuru que cambura

 

Onde les solombres de poetes ya sabios

 

Escaecieron tou xeitu d´humanidá

 

Y cuasi inoren si una breda hebo vida

 

Y si n´ellos pasó esnidiando sele

 

Ensin dexar de cuantu fore ella, probe vida, una blima

 

Onde posar posárase´l taramielláu artista

 

De circu, sobro´l cordel perfinu

 

Que les Parques curten, sin tisories,

 

A mordigaños xabaces, lloques Parques

 

Les que texen pa retexer darréu calabres.

 

A tarazones los díes bonos colaron

 

Y la vieyera afuracada polos merucos caníbales

 

Llevanta un gañote nidiu como´l nácare

 

Y quier ser ún cola lluna...

 

Hai milenta güeyos achisbando na nueche

 

Talmente´l númberu sangrín d´estrelles

 

Vagarientes y con fame, glayadores sin destín,

 

Caminos que son barganaces de fumu

 

Y fata sencia la que nun sabe tar nel llar

 

Onde toles coses sedríen como debieren.

 

El suétanu del mundu yera cosa infinita

 

Y los poetes pescudaron como buzos,

 

Dientro y llonxe de cuerpos estrozaos

 

Que van a la gueta de serenes vistíes d´endrómina.

 

Nun se percuerre´l mundu infinitu sinón ye pelo baxero

 

Endolcáu col engañu del bardu

 

Suañando vieyos mitos yá trespasaos

 

D´espades y d´años foroñosos.

 

Fakires de sieglos yá a puntu de francer

 

En febles memories de víctimes tieses

 

Colos cadriles royíos pelos utres de fierru,

 

Fierru del más puru estilu carniceru,

 

D´esos que desfilen enchipaos col sable

 

Tragáu per dientro, ún-dos, ún dos.

 

La so bandera, trapu qu´ofiende al vientu

 

Pa nós foi mortaya fedionda,

 

Sábanu de pantasmes sin vengación.

 

Entainaron a que mos punxéramos en filera

 

Coles escobes al hombru, ya espades de madera:

 

Veyura yera, cosa de neños y fasgueros.

 

Al cayer al primer estrópitu xabaz

 

Les almes fixeron de pidal carnosu

 

D´una nueva ciudá imaxinaria

 

Onde van esqueirando, ociosos, los calabres

 

De prietes cóncares baleres,

 

Baillando al son d´un sordu instrumentu

 

Solmenáu pol Degorriu de la muerte y la guerra.

 

Yá hai patria pal que nunca nun la tuviere:

 

Esi ye´l vertedoriu d´espíritos con xaciu,

 

Animales ensin razón, qu´un día tuvieren

 

Querencies, xigomencies d´eses que val más

 

Nun les tener, por cuenta de la perda

 

Fata de la vida, famienta de sentíu.

 

Túneles avisíos, pasiellos en solombra

 

Y al llau boques margurientos, clangorios,

 

Y quésiyo cuántes zarpes de besties ensin nome.

 

Nun se fixo´l catálogu de los infiernos

 

Y nun hai Dante que nun seya embusteru,

 

Pero pa min que l´alma naz yá condergada

 

Ensin rellumo posible,

 

ensin llastir al que nomar “vida”.

 

Ye esti l´escaezu más gafientu,

 

Rastráu pelos vientos, los qu´arreflunden

 Fueyes vieyes y cóncares sin xixa yá dientro.

 

Dun taba l´espíritu anochando

 Sacre se vía na redolada, Namái unes lluces de rellumo sonce, Que-y dicíen al caminante: “Nun faigas parada, home pelerín, enteque pases per estos bardios, onde la fonte glaya sonce. Fai pasos engarríos, bonal criatura Y vete drechu, ensin güeyar p´atrás, Que´equí moren los dioses de la ñatura. Abeyar nun debes baxo´l texu Sagráu qu´homes grandes llantaren. Hai mester d'envolver en llercia Al ser que profane Les divines balses, humedancies de roxada, Perles divines que suañen en verde, Xuxuríos dende´l barganaz a piques de gulir Pente pies indinos... Adonda´l pasu Caminante, Fai´l favor,”

tremando un corazón, 

guardáu en estoyu de nácare

a piques de rinchir pela tierra

onde biltó, quésiyo cuándo,

palpiente, digo, al abellugu del pasáu,

dexando nel acesmu de díes meyores

un reguerín señardosu de llárimes

vertíes dende l´empiezu la marcha,

sin más alfoz qu´un rispir fondu

por nun dexar de ser elli mesmu, fiyu

de la tierra: estoyu sapozáu na meseta

au fuiste glayando futuros, 

al debalu de vientos

secos, sordos, espantibles, 

d´aires que nunca nun miren p´atrás...

y esi muérganu, miráilu, testoneru,

alcuérdase, da-y, da-y…

 

Un pensamientu llonxe del balse

Esnala güei pente páramos ermos

Suañando nos díes de cuando reinó

Ente gayoles y duces veyures.

Un pensamientu, llonxanu elli

De sigo mesmo y de la so sencia

Nun ye quien a sollutir, anque seya un poco y seliquino,

Como´l ruxerrux de la foroña,

El por qué del so vagamundiar.

Taba'l rei na so torre

Col talantar fixu nel mal

Qu´a piques d´aportar taba.

Dixéran-y nuna maldición

Que nel so llar taba por poco y de prestáu.

Y l´espíritu del baturiciu

Que quier facer caos nel mundu,

Xingló d´esta manera:

“Rei feliz, qu´en tronu d´aire te sientes,

Has saber que´l to reinar llega al so fin

Y que´l destín tuyu ta llonxe.

Despídete agora de la to xente,

Que pa ti yá nun hai tierres, nin heriedes,

Too va escosase llueu, ensin remediu,

Pa siempres, por cuenta de voluntaes

D´imposible aldovinar.

Vete agora,

Vete al ermu secu de toles soledaes”.

Y coló llueu, con pasu firme y tristura fonda,

Como´l Cristu al que-y entraren dubies

Del Poder Supremu, del abandonu mesmu.

Al traviés de viesques avesigues

Y pente roques maxestuoses que-y glayaben:

“¡Fuera! ¡ Nun ye agora´l to reinu!”

Hubo paxes que quixeron acompañalu,

Y nun faltaron señales d´amistá al empiezu

D´esi solitariu camín de pelerín, tan solu,

Pero la voz del testón espíritu del baturiciu

Foi como´l rellampu que xingla otra dómina,

Na que´l pasáu yá vive condenáu a la capital pena,

Y con él, probe pasáu, tolos que lu andecharen,

Emporcaos pel meru barganaz del tiempu.

Y ye que l´exiliu del rei, en soledá tenía de ser,

Y mester yera dir a posar güesos en país forasteru,

Onde pa naide seya él dalquién.

Al so pasu cantaben curuxes,

Y falaba davezu colos trasgos invisibles,

Y pente cocos del suelu y llagarteses envelenaes

Dormía y facía amistá´l qu´enantes diba a cayer

En cobertores de plumes d´aves del paraísu.

Amigu de la culiebra montuna, comedor

De miruéndanos d´amarguriu y artos bederres,

Esi yera´l rei, a pocu camudáu nun salvaxe.

Farrapientu y cuasi siempres con fame,

Falaba solu y coles bisarmes más rares

D´eses que dicen qu´hai a esgaya n´altu monte,

Camín de los pasos qu´a Lleón empobinen

Y d´ehí pal llanu que nunca sos güeyos vieren.

Y en cuantes les ñeves y nublines d´Asturies

Lu dexaren en paz, cantando elles la so despidía,

Arrimóse al so cuerpu´l sol de Castía

Más gafientu que los picores de los artos toos.

Baxando les peñes y cásique palpuñando la raya

Que del horizonte´n Castía nunca t´abandona,

Camburába-y la cabeza y l´alma

De tanta sudorancia, sede y cascancia.

A rastres o a gates, como nun ermu de los peores,

Dexóse cayer y cumplió´l so destín

Que xinglara un espíritu burllón. 

¡Cuantos son reis mentanto nun los echen de so casa!