La vida, un llastir llastimeru, suena

Ente caniles d´un dios bederre, famientu,

Y cuerre como barganaz de sangre arramada.

Rellume del día d´ayeri, amaleciendo,

Rustir de güesos pa caníbales deidaes,

Pasu secretu a les tumbes profanaes

Ya espíritos forciaos, en guerra consigo mesmos.

La vida, vista dende la vida d´un muertu,

Achisbando pel ventán margurientu d´esti purgatoriu,

Aseméyase a un tortoriu vagu, inciertu,

Que nun sabe cuántes xires y tornes ha dar

Nun torbolín de povisa, y una groma de vientu.

La vida ríse del que nun sabe rir

Y posa sele nel intre dolce que s´esmuza

Bien ceo, ensin rabia, pero la vida esmuza.

Tantos años pasare güeyando tres del vidru

Siendo mozu, dexando l´augua pasar

Como si fore llei inesorable, llei de fierru,

Y endagora gueto la xixa, ensin alcontrala...

La vida ye lo que se fai basa enllamorgada,

La vida ye pasamentu perdurable,

Y milenta corones d´obleros, sangrines,

Ayalga pa nunca alcontrar, coroca,

Ciñu llanzáu al baleru, ciñu perdíu,

Y dalgún abrazu, daqué de suañu,

Un tris d´ilusión ensin fondaxe

Forgaxa d´un llabor en ridículu,

Puxarra de la mala, carondies,

Espardíes pel suelu,

Gaspies qu'al biltar llueu,

Arranen cielos de besu y formientu,

Güelgues nel sable de la infancia,

Que la mar lleva llueu,

Y fueyes amburando en montonera

D´una seronda qu'apriesa cola

Pa contra l´hibiernu esfreciendo

Cadarmes fasta´l tueru.

La vida ye pasu ente peñes argutes

Como obleros, como cuernos afilaos

Que clamien por sangre y vida,

 Que clamien.

En siendo petisu

Siempres quixe ser estranxeru

Y agora que soi grande

Muerro por dir al llar

Onde tuvi nacencia,

U sufrí y quixe alzar vuelu.

El Reinu daquella

Nun yera míu, nun yera Reinu

Sinón tierra metía ente agua,

Llueza gocho, podrén

De lo que nun ye quien

A morrer nin alitar,

Nun clangoriu eternu.

Pasio siempre col recuerdu

Y vienen en fila india les fases

De cuando yera otru

Que naguaba por ser otru.

Y agora que yá lo soi

¡Venga! A tornar p´atrás,

completando´l círculu

máxicu d´Uroboros,

nutriendo´l rau,

mazcando díes perdíos

y unes coraes dexaes na cuneta,

al debalu de vientos,

ensin consolancia pal güei.

Cuando yera neñu

Cantaba a la primera de cambiu

Y enredaba con fantasíes

Como solo los neños solos

Avecen suañar, siempre tan solos

Xugando con ún mesmu

Fasta que les etapes se quemen

Y un vientu xenxu rastra

Los resclavos de neñura

A la cuneta esa del tiempu

Y queden ellí revoltiando

Fasta que los achaple un día

Ensin sol nin rellumo dalu.

Lo que somos, ta nes cunetes.

Lo que val, ye lo que se suaña.

Lo que fuemos, foi suañao un día

Y llueu perderíase pa siempres

Sinón hubiere testoneru empeñu

N´asoleyar lo yá perdío

Y convidar al vientu

Ente ramos de flores

Pa ver onde xibla llocu

El llocu recuerdu.

Somorguiábase´l mundu

embaxo´l caín,

Y velu nun yera quien

ente esa bisarma

Que-y dicen “negocios del día a día”.

Entoncies hubo, al dicir de les Cróniques,

Un raru home de salvax antroxáu

Con un sacu al recostín

 y delles cantares na memoria

Qu´empobinara caleyes,

sin llercia a les solombres,

Pero siempre acompangáu de la de so.

Xiblaba como los xilgueros

Y nun arranaba parzamicos de naide.

Hebo xente que ver vieron,

Y dicíen d´elli falar namái

coles piedres y llagarteses.

Dicíen velu baillar col cayáu

Embaxo la lluz encesa d´una lluna roxa

De les d´agostu, que tan gafientes resulten

Pa llocos y llobos sueltos,

Seres nocherniegos

y solo malos, polo de “sueltos”,

Pero seres, a la fin,

metíos nun clangoriu eternu,

Vistíos de Guaxa fervienta de lluto,

Llocura mesma de los caminos.

Yo lu viera pasar pel camín

Delantre la mio antoxana,

Cualesquiera nueche braniega,

D´eses onde los muxos miaguen ferviendo

De celu y amoríos cégaros coles bruxes.

Foi una solombra namái, una escura llamparada

Metanes d´un fondu camín tenebreru.

Daqué lu avisó, como nun xirpíu,

Y ensin dicime sacre, en fumu y grayíos

Camudóse, y unes rises lloques metiéronseme dientro,

Mui dientro.

Yá voi yo pelos caminos

Empobinando solu y contentu,

Y xiblo cantos endromáticos,

Baillando solu, al debalu,

Per esi mundu alantre.

Coles llagarteses falo,

y con piedres y plantes.

Soi un cuerpu namái...

Asonsoña´l mio cantu

Esi duce debuir

D´animalinos llixeros

Que pueblen l´aire,

Y esnalen nel calce platiáu,

O esnidien a los mios pies

Andayones, mundu alantre,

Como l´ave migratoria,

Como´l bon golfín marín...

Esconsona´l mio cantu

Les rises del xirigate natural:

Un pasu y otru pasu,

quiciás nun hai más

que tar de pasu,

y lo otro ye rir, güeyar, aportar...

nun sé onde, pero eso tien de ser.

Que nun hai fondo.

 Sólo caleya. Nada más.

Ta´l ruíu, que nun mos dexa llamber

El duce marmuriu del regueru

Constante y aseláu;

Ehí ta la máquina, xabaz y gris,

Toa apurada por esaniciar el verdín,

Y n´algamando la gris tumba de la fatura,

Malapenes mos queda la honra

De nun querer sentir más al poeta.

Pero mira-y lo que vos digo:

Nun hai poeta meyor que´l cantu

Raitaneru énte foles de la mar

Y la música esnalada peles caparines.

 Pero too ello yá pasó.  

Lo qu´hai cuando ún s´atreve

A poner lletres en filera

Y diz al vientu y al papel

tolo inefable,

Lletible y sonso,

Yo nun lo sé.

Ciencies habrá que sepan

De mares y meteoros,

De llugares terremotos

Y sencies perdíes nel pínfanu

Misteriosu,

Pero saber d´esti saber

Cincante a pallabres lloques

Y trunfu del tiempu escaecíu

Sobre coraes rotes,

Nun lu hai, nin saben los dioses

Si ún día lu trayerá

Esñalopiando Hermes,

El que crucia les puertes

De lo tapecío y falto d´invención,

Esi rei de magos tou él maxa

Y amu d´unes muses murnies

Enllamorgaes fasta´l tuétanu

Na ciencia infusa de les pallabres

Celestes coles que s´arruga l´alma.

Nun ye un home poeta col espíritu plancháu

Nin almidón nos tueros de los vivires,

Ensin alcordances devoraes en redoles de babosa

Anaranxada y bederre qu´esguila del güertu pa les tumbes.

Esti oficiu ye d´alcordances siempres:

Ta la tierra húmeda entá,

Y ella supo onde ñací,

Hai´l sangre que cuerre anaína

Y los güercos nun son a llapala toa,

Anque espantibles dicen al poeta

 Que yá ta too perdío,

Y la patria encaína a marches forzaes

Ensin saber ónde dirá aparar.

Oficiu y cura,

Melecina pa un celebru afuracáu

Per aciu del guxán del tiempu

Fenetible dios de ctóniques

Consecuencies amosaes en caniles

D´esaniciu, goliendo a final,

 Eso ye facer versos. 

Oficiu poéticu, mal andamos

Tratando d´iguar lo que fo

Y yá nun va ser más.

Pallabres al vientu.

Soi del augua,

soi del caín,

soi del chornosu vientu sur,

y del fríu nordés setembrino.

soi del orpín sonce, menudu, anxélicu,

Y tamién de l´apavoriante galerna,

del bederre vendoval.

Camúdeste ceo,

entrín siempre engañes, tiempu llariegu,

Y faes que la mio sencia corra tres de ti,

 Tantu,  tantu t´añoro.

Espurriéronse, a lo xole,

Les vieyes alcordances.

Dacuando seyelloses

Elles aporten a min,

Engurriando les duldes

Nocherniegues en velees

D´un iviernu ensin fin.

Esnidien que dan llercia

Arreblaguen les muries y defenses

Con brenga antaño alzaes

Y cuerren como lloques a facer batura

Onde llantara porgüeyos y otros árboles

Pa cayer pacetible dalgún día

pa tornar a ser yerba, al sol medrar

Y nun sentir más los llatidos nel pínfanu.

Pero nunca nun hai abonda paz

 Demientres la tierra dea vueltes alredor.

Baleru vi´l llar

Onde tantes vides camburaron.

Na velea fui a ver

La yedra esguilando dica´l techu, onde´l gayu los vientos,

Y garrando la piedra colos sos brazos testerones,

A piques cayer, casa antigua, muria de sieglos eternos,

Ente artos lo veo: cómente los bichos

y endagora nun hai quien pase

Pela puerta camudada en tabla d´un naufraxu, tierra adientro.

Balera ta l´alma d´esi neñu que goció

Yá mui llonxanes, como barques en díes sin vientu

A la pesca tres la borrina, pente voces de marineros, alló

Nun horizonte au nun ye a vivir nin tan siquier el recuerdu.

Baleru. Quédaseme nel cuerpu un furacu de carne mancada

Cola memoria caltenida peles célules, namái, con eso.

Pero lo otro, esqueirando como llocu, yá nun s´atopa.

 Adiós.

Nun país tan olvidadizu,

Yá nun recuerdo si nací yo.

Sé que´l mio berciu yera verde

Y los cucos de yerba doraos de xunetu

Valdríen pa facer peselbes amorosos,

Onde nacieran dioses, fades, fíos del cielu...

Nuna nación siempre tienra au´l cielu ta en suelu

Llapando´l cielu la rica humedancia

L´agua bendita de la herba,

Meciéndose sonce pa con ella.

Nun paecería abegoso ser santu,

Y vivir como talu.

Aquelli, país de mio recuerdu,

NUn yera llar pa les fosques falcatrúes.

Nesta estepa enfoscada

Y camburante siempre dicen: “Yo´l primeru”,

Cosa que pa min nun val, mamina mía.

Que tu me deprendisti a vivir guardáu,

El caberu de toos,

 Deprendístime

A dilíme pente nublines eternes

Ente silencios

Deprendístime

A rumiar sonce,

A tomar por únicu y verdaderu techu

La cumal del árbol vieyu y candial

A facer como templu la solombra los carbayos

Y la llume del sol espeyada nos montes

Cuando risca l´alba o tapez el mundu...

Saber d´eso,

 Anque nun sepas más nada del mundu.