El vientu d´almes
Esparde´l so llenzu de mortandá
Xuxuriante Compaña,
lexón d'espíritos condenaos
y carne de toos arrenegada.
El vientu d'almes
Arrasa´l mio rostru,
absuerbe'l mio ser,
llámame,
llámame.
Vive nes solombres,
vive na biesca,
ruxe na gruta
Y al fundise en mi,
quema,
quema,
quema.
Llena les ánfores cóncaves con sesos y coraes. El demiurgu sangrín va revolver la mecedura. La maldá más perfonda del Universu va surdir de la so boca. Cuspiendo la bébora fedionda, toa castra de creatura malina va llevantar cabeza baxo´l Sol. ¿Sol? ¡Astru ofendíu! Yá nun gocies de reinu dalu baxo la to corona dorada…
Esploradores somos
Qu´anecien pescudar páxaros
Nel mar perfondu
Y nun somos quien a estremar
Escames o plumes,
Rises o lloros,
Barcos fundíos,
Estrelles brillantes,
Sían de cielu o de mar.
Asina somos,
Asina aportamos:
Y en riscando l´alba
Alcordaránse de nós,
Los que pasemos de nueche
Ensin ruíu, selemente,
Con andar de palomba,
Falando baxo
Y con vocación de lluceros.
Llegáu´l tiempu
Voi andar lo desandao
Y esguilando pa la cume
Más alta, onde añeren les Reines
De vista llonxana
Espurriré míes ales nueves
Arcanxéliques ya infinites
Pa dir atropando oxetos perdíos
Na oficina que l´Olimpu fundó.
N´otru país y en llonxanu tiempu Conocíte y supi del arume de les fades Qu´entainen haza Puertos Grises D´au nunca nun volverán. N´otru país y en distintu tiempu Yo fui otru queriendo ser distintu Y gociaba con ver rostros de lluz cande Y güeyos rubios y tienros. Pero eso yera n´otru país y en dengún tiempu. Pero eso yera nada: Lluz del atapecer, ruíu, polvu, vientu. Inda más, menos qu´eso: Marmullos -alpenes- d´un muertu. 
Vien de nueche
Con pasu sele
Qu´arreciende a muerte.
Vien d´una estrella
Brillante y fea
Onde moren los muertos
Onde glayen de pena.
Y trema la Muerte
Al ver la llaceria
De la vida podre
Más terrible qu´ella.
Y como dicen vieyos sabios:
Sabiu ye´l que mira llonxe
Y guarda too na memoria
Pa colar a tiempos remotos
U buscar nuevu cazumbre pa los venideros.
Y porque equí yá nun queden vivos
Y los amigos colaron col vientu fresco
Hai que llantar bandera
De gayeru imperiu nuevu
Onde añeren les aigles fuertes
De vista infinita y etereu cristal
Nel cristalín irrompible d´Argos celestial.
Nes cumales que busquen gloria quiero
Facer palacios y votos a la sencia alicada
Y dir más alto si soi quien.
Que naide me torgue esti divín vuelu
Al Ida tremendu, d´au vinimos una vez los felices
Hai un arume de llerza y misteriu
Neses imáxenes que ronden
Al rodiu de la mente n´inxesta
Que nagua por otru horizonte
Y nunca nun por esta vida febleF
echa de remiendos y clavos.
Hai un tastu secu y fonderu,
Un agrín de dolce ya ingrienta testura
Que vive inda cuando nun hai vida verdadera
Y esnala pente cotolles puerques
D´au medró un guapu xardín y un texu
Quietu y altu, como l´arguyu fácil d´achaplar.
Sacru asientu la tierra
Onde tu xugasti,
Tierra que va abrise pa xintar calabres,
Tierra negro de vientre feliz.
“L´arispia llingua del Príncipe aportó dende la Nueche, la Ma de la Tierra y del Firmamentu. Elli llevantóse contra´l Reinu cuantayá, cuando entá nun esistía´l Mundu, y mandó a les Muses de los Cementerios reinar polos sieglos de los sieglos. Y el Pá consintió y nada nun fizo…”
Nun sé cuándo les coses emprimar a cayer. Sólo sé que too s´esbarrumbó y nada nin naide queda pa historialo. Ye una pena que yo y tu cayéramos, y que cayera tol mundu nuna lloca rindición, de les que yá nun se dan, como les del vencíu qu´agacha´l cuerpu pa besar les botes del que t´invade. Yo creo que foi un folaxe d´esos tremendos, una vagamar o galerna, de les que nun ye a aguantar El Muro y tira la casa abaxo. El mundu yá nun ye lo qu´antaño yera: veo les llombrigues nalando na mar, y veo los güesos saliendo nel contenedor del Barriu L´Arena. Un neñu llora baxo l´alcantariella, y les gaviluetes saquen los güeyos a la xente. Nun sé, pero dame que les coses emprimaron a cayer.
Contautar col autor o autora | Archivu | ¡Crea'l to Blog yá! Fácil y de baldre
Esbilla
del.icio.us