Al esfrecer al amanecerín, vieno la bayura de voces. Vieno, sí, talmente como un exércitu d´almes en pena, enraxonáu y porcaz. Calcaben güelgues de sangre na ñeve y ofendíen a los cielos al pasar pel valle. Empobinaron pel mediu l´aldea y fixeron sonar grandes ruxerruxes. Guardáronse los vecinos, medranosos pola llegada d´esi fríu, d´esi golor, d´esa xentecaya procedente del otru mundu. Los malos díes yá taben equí, y un hibiernu de negrura y maldición taba a piques d´entrar nel mundu los vivos.

Llaparaes d´espíritos, y ensame d´almes abiertes en canal. Fueu fatu ensin conocencia que cuerre pel cielu sollertando a llocos somorguiaos en plena velea. Batifondu de coraes güeques que busquen per onde se sapozar, si en cementerios d´estañu o n´estanques de cuchu y poder xacer ansí, en puerca llamuerga. Lluces ensin xacíu que baxen del cielu anunciando´l pecao y fines del mundu. L´Adversariu de prieta pelleya yá vien coles áscuares prendíes col zusme encarnispáu del odiu. Ta cerca y nun somos a velo bien. Ye hora de la rindición.

Ullen, y cuerren que se maten.

Glayen, y espurren grandes zarpes

Pa contra min.

Son utres grandes, que clamien pola vida

Y nagüen pol sangre de los vivos.

Condenaos tamos toos

Y hai mal na mesma corada del ser.

Esos picos xigantes

Espedacen criaturines,

Sían bones o malines,

Lleven culpa a recostines

O bondá inocente sin fin.

El casu ye:

 Ullen, y cuerren que se maten.

La vida, un llastir llastimeru, suena

Ente caniles d´un dios bederre, famientu,

Y cuerre como barganaz de sangre arramada.

Rellume del día d´ayeri, amaleciendo,

Rustir de güesos pa caníbales deidaes,

Pasu secretu a les tumbes profanaes

Ya espíritos forciaos, en guerra consigo mesmos.

La vida, vista dende la vida d´un muertu,

Achisbando pel ventán margurientu d´esti purgatoriu,

Aseméyase a un tortoriu vagu, inciertu,

Que nun sabe cuántes xires y tornes ha dar

Nun torbolín de povisa, y una groma de vientu.

La vida ríse del que nun sabe rir

Y posa sele nel intre dolce que s´esmuza

Bien ceo, ensin rabia, pero la vida esmuza.

Tantos años pasare güeyando tres del vidru

Siendo mozu, dexando l´augua pasar

Como si fore llei inesorable, llei de fierru,

Y endagora gueto la xixa, ensin alcontrala...

La vida ye lo que se fai basa enllamorgada,

La vida ye pasamentu perdurable,

Y milenta corones d´obleros, sangrines,

Ayalga pa nunca alcontrar, coroca,

Ciñu llanzáu al baleru, ciñu perdíu,

Y dalgún abrazu, daqué de suañu,

Un tris d´ilusión ensin fondaxe

Forgaxa d´un llabor en ridículu,

Puxarra de la mala, carondies,

Espardíes pel suelu,

Gaspies qu'al biltar llueu,

Arranen cielos de besu y formientu,

Güelgues nel sable de la infancia,

Que la mar lleva llueu,

Y fueyes amburando en montonera

D´una seronda qu'apriesa cola

Pa contra l´hibiernu esfreciendo

Cadarmes fasta´l tueru.

La vida ye pasu ente peñes argutes

Como obleros, como cuernos afilaos

Que clamien por sangre y vida,

 Que clamien.

En siendo petisu

Siempres quixe ser estranxeru

Y agora que soi grande

Muerro por dir al llar

Onde tuvi nacencia,

U sufrí y quixe alzar vuelu.

El Reinu daquella

Nun yera míu, nun yera Reinu

Sinón tierra metía ente agua,

Llueza gocho, podrén

De lo que nun ye quien

A morrer nin alitar,

Nun clangoriu eternu.

Pasio siempre col recuerdu

Y vienen en fila india les fases

De cuando yera otru

Que naguaba por ser otru.

Y agora que yá lo soi

¡Venga! A tornar p´atrás,

completando´l círculu

máxicu d´Uroboros,

nutriendo´l rau,

mazcando díes perdíos

y unes coraes dexaes na cuneta,

al debalu de vientos,

ensin consolancia pal güei.

Cuando yera neñu

Cantaba a la primera de cambiu

Y enredaba con fantasíes

Como solo los neños solos

Avecen suañar, siempre tan solos

Xugando con ún mesmu

Fasta que les etapes se quemen

Y un vientu xenxu rastra

Los resclavos de neñura

A la cuneta esa del tiempu

Y queden ellí revoltiando

Fasta que los achaple un día

Ensin sol nin rellumo dalu.

Lo que somos, ta nes cunetes.

Lo que val, ye lo que se suaña.

Lo que fuemos, foi suañao un día

Y llueu perderíase pa siempres

Sinón hubiere testoneru empeñu

N´asoleyar lo yá perdío

Y convidar al vientu

Ente ramos de flores

Pa ver onde xibla llocu

El llocu recuerdu.

Somorguiábase´l mundu

embaxo´l caín,

Y velu nun yera quien

ente esa bisarma

Que-y dicen “negocios del día a día”.

Entoncies hubo, al dicir de les Cróniques,

Un raru home de salvax antroxáu

Con un sacu al recostín

 y delles cantares na memoria

Qu´empobinara caleyes,

sin llercia a les solombres,

Pero siempre acompangáu de la de so.

Xiblaba como los xilgueros

Y nun arranaba parzamicos de naide.

Hebo xente que ver vieron,

Y dicíen d´elli falar namái

coles piedres y llagarteses.

Dicíen velu baillar col cayáu

Embaxo la lluz encesa d´una lluna roxa

De les d´agostu, que tan gafientes resulten

Pa llocos y llobos sueltos,

Seres nocherniegos

y solo malos, polo de “sueltos”,

Pero seres, a la fin,

metíos nun clangoriu eternu,

Vistíos de Guaxa fervienta de lluto,

Llocura mesma de los caminos.

Yo lu viera pasar pel camín

Delantre la mio antoxana,

Cualesquiera nueche braniega,

D´eses onde los muxos miaguen ferviendo

De celu y amoríos cégaros coles bruxes.

Foi una solombra namái, una escura llamparada

Metanes d´un fondu camín tenebreru.

Daqué lu avisó, como nun xirpíu,

Y ensin dicime sacre, en fumu y grayíos

Camudóse, y unes rises lloques metiéronseme dientro,

Mui dientro.

Yá voi yo pelos caminos

Empobinando solu y contentu,

Y xiblo cantos endromáticos,

Baillando solu, al debalu,

Per esi mundu alantre.

Coles llagarteses falo,

y con piedres y plantes.

Soi un cuerpu namái...

Asonsoña´l mio cantu

Esi duce debuir

D´animalinos llixeros

Que pueblen l´aire,

Y esnalen nel calce platiáu,

O esnidien a los mios pies

Andayones, mundu alantre,

Como l´ave migratoria,

Como´l bon golfín marín...

Esconsona´l mio cantu

Les rises del xirigate natural:

Un pasu y otru pasu,

quiciás nun hai más

que tar de pasu,

y lo otro ye rir, güeyar, aportar...

nun sé onde, pero eso tien de ser.

Que nun hai fondo.

 Sólo caleya. Nada más.

Ta´l ruíu, que nun mos dexa llamber

El duce marmuriu del regueru

Constante y aseláu;

Ehí ta la máquina, xabaz y gris,

Toa apurada por esaniciar el verdín,

Y n´algamando la gris tumba de la fatura,

Malapenes mos queda la honra

De nun querer sentir más al poeta.

Pero mira-y lo que vos digo:

Nun hai poeta meyor que´l cantu

Raitaneru énte foles de la mar

Y la música esnalada peles caparines.

 Pero too ello yá pasó.  

Lo qu´hai cuando ún s´atreve

A poner lletres en filera

Y diz al vientu y al papel

tolo inefable,

Lletible y sonso,

Yo nun lo sé.

Ciencies habrá que sepan

De mares y meteoros,

De llugares terremotos

Y sencies perdíes nel pínfanu

Misteriosu,

Pero saber d´esti saber

Cincante a pallabres lloques

Y trunfu del tiempu escaecíu

Sobre coraes rotes,

Nun lu hai, nin saben los dioses

Si ún día lu trayerá

Esñalopiando Hermes,

El que crucia les puertes

De lo tapecío y falto d´invención,

Esi rei de magos tou él maxa

Y amu d´unes muses murnies

Enllamorgaes fasta´l tuétanu

Na ciencia infusa de les pallabres

Celestes coles que s´arruga l´alma.

Nun ye un home poeta col espíritu plancháu

Nin almidón nos tueros de los vivires,

Ensin alcordances devoraes en redoles de babosa

Anaranxada y bederre qu´esguila del güertu pa les tumbes.

Esti oficiu ye d´alcordances siempres:

Ta la tierra húmeda entá,

Y ella supo onde ñací,

Hai´l sangre que cuerre anaína

Y los güercos nun son a llapala toa,

Anque espantibles dicen al poeta

 Que yá ta too perdío,

Y la patria encaína a marches forzaes

Ensin saber ónde dirá aparar.

Oficiu y cura,

Melecina pa un celebru afuracáu

Per aciu del guxán del tiempu

Fenetible dios de ctóniques

Consecuencies amosaes en caniles

D´esaniciu, goliendo a final,

 Eso ye facer versos. 

Oficiu poéticu, mal andamos

Tratando d´iguar lo que fo

Y yá nun va ser más.

Pallabres al vientu.